चेक बाऊन्स प्रकरणी संगमनेर येथील सराफाला ६ महिने कारावास आणि साडेसहा लाखांच्या भरपाईचा आदेश

महाराष्ट्र संवाद न्यूज ऑनलाईन 

संगमनेर:

शहरातील राष्ट्रसंत आचार्य आनंद ऋषीजी महाराज नागरी पतसंस्थेकडून घेतलेल्या कर्जाच्या थकीत रकमेपोटी दिलेला चेक वटला नसल्याने दाखल झालेल्या धनादेश अनादर प्रकरणात संगमनेर न्यायालयाने आरोपीला सहा महिने कारावास आणि सुमारे साडेसहा लाख रुपयांची भरपाई देण्याचा महत्त्वपूर्ण निकाल बुधवारी दिला.

मिळालेल्या माहितीनुसार, संगमनेर येथील ज्वेलर्स व्यावसायिक आशिष सुभाष वर्मा यांनी राष्ट्रसंत आचार्य आनंद ऋषीजी महाराज नागरी पतसंस्थेकडून ४० लाख रुपयांचे जमीन व गृहतारण कर्ज घेतले होते. या कर्जाची मुद्दल व व्याजासह थकबाकी रक्कम भरण्यासाठी त्यांनी पतसंस्थेला ३,२४,०५१ रुपयांचा धनादेश दिला होता. मात्र, आशिष वर्मा यांच्या खात्यात पुरेशी रक्कम उपलब्ध नसल्याने संबंधित बँकेने तो धनादेश अनादरित (बाऊन्स) करून परत पाठवला.

धनादेश बाऊन्स झाल्यानंतर पतसंस्थेने ॲड. राजेश जे. भुतडा यांच्यामार्फत आरोपी आशिष सुभाष वर्मा यांना कायदेशीर नोटीस पाठवून रकमेची मागणी केली होती. परंतु, नोटीस मिळूनही त्यांनी थकीत रक्कम जमा न केल्याने पतसंस्थेने ॲड. राजेश जे. भुतडा यांच्यामार्फत संगमनेर येथील न्यायालयात क्रिमिनल केस नंबर ११३४/२०१९ अन्वये फिर्याद दाखल केली होती.

या खटल्याची सुनावणी पूर्ण होऊन आरोपी आशिष सुभाष वर्मा यांच्याविरोधातील आरोप सिद्ध झाले. त्यामुळे प्रथम वर्ग न्यायदंडाधिकारी जी. ए. करजगार यांनी आरोपी आशिष वर्मा याला ६ महिने कारावासाची शिक्षा सुनावली आहे. तसेच तक्रारदार पतसंस्थेला ६,४८,००० रुपये नुकसान भरपाई म्हणून देण्याचा आदेशही दिला आहे.

विशेष म्हणजे, आरोपी आशिष सुभाष वर्मा यापूर्वीच फरारी आरोपी म्हणून घोषित झाल्यानंतर पोलिसांनी त्याला पकडल्यापासून तुरुंगात आहेत. संगमनेर शहरात नावाजलेल्या सराफ व्यावसायिकाला चेक बाऊन्स प्रकरणात न्यायालयाने दिलेल्या या शिक्षेमुळे संपूर्ण संगमनेर शहर व परिसरात मोठी खळबळ उडाली असून या प्रकरणाची जोरदार चर्चा सुरू आहे.