दारूच्या नशेत झालेल्या वादातून मारहाण करून हत्या करणाऱ्या आरोपीस जन्मठेप; संगमनेर न्यायालयाचा महत्त्वपूर्ण निकाल

महाराष्ट्र संवाद न्यूज ऑनलाईन:

दारूच्या नशेत झालेल्या वादातून एका व्यक्तीच्या डोक्यात व तोंडावर दगड मारून त्यांची निघृण हत्या करणाऱ्या आरोपीस संगमनेर येथील जिल्हा व अतिरिक्त सत्र न्यायालयाने जन्मठेपेची आणि पन्नास हजार रुपये दंडाची शिक्षा सुनावली आहे. दंड न भरल्यास आरोपीला अतिरिक्त ३ महिन्यांची शिक्षा भोगावी लागणार आहे. 

३१ ऑगस्ट २०२६ रोजी न्यायालयाकडून हा महत्त्वपूर्ण निकाल देण्यात आला. मिळालेल्या माहितीनुसार, ५ ऑक्टोबर २०२२ रोजी दसऱ्याच्या दिवशी संध्याकाळी साडेसहा वाजेच्या सुमारास अकोले पोलीस ठाण्याच्या हद्दीत ही घटना घडली होती. आरोपी काशिनाथ रामनाथ गिऱ्हे हा दारूच्या नशेत फिर्यादी इंदुबाई बारकु गिऱ्हे यांच्या घराच्या दारात आला होता. “तुझ्या पतीने मला गावातून येताना आईवरून शिवीगाळ केली, तो कुठे आहे? मी आज त्याला जिवंत सोडणार नाही,” असे म्हणून आरोपी दारातच ओरडाओरड करत होता.

त्याच वेळी इंदुबाई यांचे पती बारकु गिऱ्हे हे मागून आपल्या घरी आले. आरोपी काशिनाथ याने बारकु यांना घराच्या दारातील ओट्याजवळ खाली पाडले आणि जवळच पडलेला एक मोठा दगड हातात घेऊन त्यांच्या डोक्यात व तोंडावर ४ ते ५ वेळा जोरात मारला.

गंभीर मार लागल्यामुळे बारकु गिऱ्हे हे जागीच निपचित पडले. फिर्यादी व इतरांच्या आरडाओरड्यानंतर परिसरातील लोक जमा झाले. गंभीर जखमी अवस्थेत बारकु यांना रुग्णवाहिकेतून अकोले येथील सरकारी दवाखान्यात उपचारासाठी नेण्यात आले, परंतु डॉक्टरांनी तपासून उपचारापूर्वीच त्यांना मृत घोषित केले.

या प्रकरणी फिर्यादी इंदुबाई गिऱ्हे यांच्या तक्रारीवरून अकोले पोलीस ठाण्यात आरोपीविरुद्ध भा.दं.वि. कलम ३०२ अन्वये गुन्हा दाखल करण्यात आला होता. या गुन्ह्याचा तपास पूर्ण करून न्यायालयात दोषारोपपत्र दाखल करण्यात आले होते.

सदर केसची सुनावणी जिल्हा न्यायालय क्र. ४, संगमनेर यांच्यापुढे पार पडली. खटल्यादरम्यान एकूण ७ साक्षीदारांची साक्ष नोंदवण्यात आली. यामध्ये फिर्यादी, त्यांची मुलगी सविता केरु पारधी, डॉ. सुरेखा एस. करवंदे तसेच तपास अधिकारी सहाय्यक पोलीस निरीक्षक मिथुन घुगे यांची साक्ष अत्यंत महत्त्वाची ठरली.

जिल्हा व अतिरिक्त सत्र न्यायाधीश व्ही. जी. गव्हाणे यांनी प्रत्यक्षदर्शी साक्षीदार आणि डॉक्टरांची साक्ष ग्राह्य धरत, सादर केलेला सबळ युक्तिवाद मान्य केला. सर्व पुरावे व साक्षीदारांच्या जबाबांवरून आरोपी काशिनाथ रामनाथ गिऱ्हे याच्यावरील हत्येचा आरोप सिद्ध झाल्याने न्यायालयाने त्यास जन्मठेप आणि ५०,००० रुपये दंडाची शिक्षा सुनावली.