Annant Ppangarkar
महाराष्ट्र संवाद न्यूज ऑनलाईन:
समाजमाध्यमांच्या माध्यमातून खरेदी केलेल्या आणि नशेसह शारीरिक ताकदीसाठी बेकायदेशीरपणे वापरल्या जाणाऱ्या ‘मेफेनटर्माईन सल्फेट’ या इंजेक्शन्सच्या ४० बाटल्या कोतवाली पोलिसांनी जप्त केल्या आहेत. गांधी मैदान परिसरातून ही कारवाई करण्यात आली असून, या प्रकरणी तिघांना अटक करण्यात आली आहे.
न्यायालयाने त्यांना दोन दिवसांची पोलीस कोठडी सुनावली आहे. प्रताप अशोक अकोलकर (वय २१, रा. करंजी, पाथर्डी), तेजस गंगाधर वारुळे (वय २१, रा. तपोवन रस्ता, अहिल्यानगर) आणि तेजस अमित उळागड्डे (वय २२, रा. एमआयडीसी, अहिल्यानगर) अशी अटक करण्यात आलेल्या तिघांची नावे आहेत.
हे तिघेही नियमित व्यायामशाळेत (जिम) जाणारे आहेत. त्यामुळे या घातक इंजेक्शन्सचा वापर व्यायामपटूंकडून केला जात असावा, असा तीव्र संशय कोतवालीचे पोलीस निरीक्षक नितीन देशमुख यांनी व्यक्त केला आहे.
तपासात उघड झालेल्या माहितीनुसार, आरोपींनी समाजमाध्यमांवरील माहितीच्या आधारे डॉक्टरांच्या चिठ्ठीशिवाय ही इंजेक्शन्स ऑनलाईन मागवली होती. ३०० रुपयांना मिळालेले एक इंजेक्शन ६०० रुपयांना विकण्याचा त्यांचा बेत होता. शहरातील गांधी मैदान परिसरातील शाळांजवळ हे तिघे विक्रीसाठी आले असताना पोलिसांनी त्यांना ताब्यात घेतले.
त्यांच्याकडून १५ हजार रुपये किमतीच्या ४० बाटल्या आणि एक दुचाकी जप्त करण्यात आली आहे. या प्रकरणी पोलीस उपनिरीक्षक गणेश देशमुख अधिक तपास करत आहेत.
