संगमनेर बस स्थानक परिसरात कारवाई; एमडी ड्रग्स विक्री करणाऱ्या तरुणासह २ लाख ७ हजारांच्या मुद्देमाल पकडला

Annant Ppangarkar
संगमनेर (प्रतिनिधी):
संगमनेर शहरात बेकायदेशीररीत्या अमली पदार्थांची विक्री करणाऱ्या एका तरुणाला संगमनेर शहर पोलिसांनी रंगेहाथ पकडून त्याच्याकडून १ लाख १७ हजार रुपये किमतीची ‘एम.डी.’ (मेफेड्रोन) पावडर आणि दुचाकीसह एकूण २ लाख ७ हजार रुपयांचा मुद्देमाल जप्त केला आहे. त्यानंतर ताब्यात घेतलेल्या काशीफ कुरेशी याला शुक्रवारी पहाटे शहर पोलिसांनी अटक केली आहे.
मिळालेल्या माहितीनुसार, गुरुवारी (दिनांक ३ सप्टेंबर) सायंकाळी सात ते मध्यरात्री साडेबारा वाजेच्या सुमारास संगमनेर शहरातील बस स्थानक परिसरातील रस्त्यावरील मोकळ्या जागेत ही कारवाई करण्यात आली. संशयित आरोपी काशिफ असद कुरेशी (वय २७, रा. कादरी मशिदीजवळ, भारतनगर, संगमनेर) हा अमली पदार्थांची विक्री करण्यासाठी स्वतःच्या ताब्यात एम.डी. बाळगून उभा असल्याची बातमी पोलिसांना मिळाली होती.
त्यानुसार पोलिसांनी तात्काळ घटनास्थळी सापळा रचून धाड टाकली. या कारवाईदरम्यान आरोपीच्या ताब्यातून १,१७,००० रुपये किमतीचे ३९ ग्रॅम वजनाचे ‘एम.डी.’ ड्रग्ज आणि ९०,००० रुपये किमतीची मारुती सुझुकी कंपनीची विनानंबर असलेली पिवळ्या रंगाची दुचाकी असा एकूण २,०७,००० रुपयांचा मुद्देमाल जप्त करण्यात आला.
या प्रकरणी पोलीस अंमलदार राहुल कैलास पांडे (वय ३३) यांच्या फिर्यादीवरून संगमनेर शहर पोलीस ठाण्यात गुन्हा रजि. नं. ८३५/२०२६, अमली औषधी द्रव्य व मनःप्रभावी पदार्थ अधिनियम १९८५ (NDPS Act) च्या कलम ८(क), २२(ब) सह बी.एन.एस. २०२३ चे कलम २२१ प्रमाणे गुन्हा दाखल करण्यात आला आहे.
सदर कारवाई उपविभागीय पोलीस अधिकारी डॉ. कुणाल सोनवणे यांच्या मार्गदर्शनाखाली पोलीस निरीक्षक समीर बारवकर, पोलीस उपनिरीक्षक श्रीकांत सावंत यांच्यासह संगमनेर शहर पोलिसांच्या पथकाने केली असून पोलीस उपनिरीक्षक सावंत हे पुढील तपास करत आहेत.