महाराष्ट्र संवाद न्यूज विशेष: दुष्काळाची सावली अन साडेचार टीएमसी पाण्याची उधळपट्टी! अकोले-संगमनेरमध्ये संतापाचा उद्रेक; सत्ताधाऱ्यांच्या वरदहस्ताने निळवंडेचा खेळखंडोबा?

महाराष्ट्र संवाद न्यूज ऑनलाईन
अनंत पांगारकर –
राज्यभरात दुष्काळाचे सावट गडद झाले असून शेतकरी आणि नागरिक पाण्याचा एक-एक थेंब जपून वापरण्यासाठी धडपडत आहेत. अहिल्यानगर जिल्ह्याला शासनाने दुष्काळग्रस्त घोषित केले असताना दुसरीकडे मात्र सत्ताधाऱ्यांच्या आशीर्वादामुळे निळवंडे धरणातून पाण्याची उधळपट्टी सुरू आहे. मागील तब्बल ४० दिवसांपासून निळवंडे धरणाचे आवर्तन अविरत सुरू असून, आतापर्यंत साडेचार टीएमसी म्हणजे तब्बल ४ हजार ४१० दशलक्ष घनफूट पाणी वाहून गेले आहे. ऐन दुष्काळाच्या तोंडावर सुरू असलेल्या या बेजबाबदार कारभाराविरोधात अकोले आणि संगमनेर तालुक्यातील जनतेमध्ये तीव्र संतापाचा लाव्हा उसळला आहे.
पाण्याच्या या भयंकर नासाडीमुळे येत्या कडक उन्हाळ्यात संपूर्ण परिसराला भीषण पाणीटंचाईच्या झळा सहन कराव्या लागणार आहेत. असे असतानाही जलसंपदा विभाग आणि लोकप्रतिनिधी या उधळपट्टीकडे डोळेझाक करत असल्याचा आरोप होत आहे. अकोले येथे मध्यंतरी सर्वपक्षीय कार्यकर्त्यांनी आमदार डॉ. किरण लहामटे यांच्या उपस्थितीत जलसंपदा विभागाच्या अधिकाऱ्यांना थेट धारेवर धरले होते.
निळवंडेचे आवर्तन तातडीने बंद न केल्यास आणि उच्चस्तरीय कालव्याचे पाणी न सोडल्यास धरणाचे चाकच बंद पाडण्याचा इशाराही देण्यात आला होता. मात्र, अधिकाऱ्यांच्या आणि पालकमंत्र्यांच्या उघड्या डोळ्यांदेखत पाण्याचा हा विसर्ग आजही ११०० क्यूसेकने सुरूच आहे. संगमनेरमधील सुज्ञ नागरिकांनी आणि शेतकर्‍यांनी सोशल मीडियाच्या माध्यमातून या उधळपट्टीविरोधात जोरदार रणशिंग फुंकले आहे.
८ हजार ३३४ दशलक्ष घनफूट क्षमतेच्या निळवंडे धरणातील साठा या ४० दिवसांच्या अनागोंदी कारभारामुळे आता थेट ५ हजार दशलक्ष घनफूट, म्हणजेच ५९.९९ टक्क्यांवर खाली आला आहे. धरण वेगाने रिकामे होत असल्याने येत्या काही दिवसांत पिण्याच्या पाण्याची आणि शेतीची परिस्थिती अत्यंत बिकट होणार आहे. दुष्काळाच्या झळा समोर दिसत असताना आणि भविष्यात पाण्यासाठी हाहाकार उडण्याची शक्यता असताना ही पाण्याची उधळपट्टी नक्की कोणाच्या सांगण्यावरून आणि कोणाच्या भल्यासाठी सुरू आहे, असा जळजळीत सवाल जनता विचारत आहे.
जिल्ह्याचे पालकमंत्री राधाकृष्ण विखे पाटील यांनी या परिस्थितीचे गांभीर्य ओळखून पुढाकार घेत हे आवर्तन तात्काळ थांबवावे आणि पाण्याचे नियोजन करावे, अन्यथा संगमनेर आणि अकोलेकरांना रस्त्यावर उतरून तीव्र आंदोलन छेडावे लागेल.