महाराष्ट्र संवाद न्यूज नेटवर्क
नेवासे तालुक्याच्या पाहणी दौऱ्यात राज्याच्या महसूलमंत्र्यांना प्रवरासंगम पासून काही अंतरावरील मंगळापूर गावात चक्क वाळू उपश्यासाठी वापरल्या जाणाऱ्या दोन लोखंडी बोटी आढळून आल्या. मंत्र्यांच्या दौऱ्यातच वाळू तस्करीचा मुद्दा समोर आल्याने संतापलेल्या विखे पाटील यांनी जिल्हाधिकाऱ्यांसह अधिकाऱ्यांची चांगलीच कान उघाडणी बोटी जप्त करून गुन्हे दाखल करण्याचे आदेश दिले.
अहमदनगरचे पालकमंत्री आणि राज्याचे महसूल मंत्री राधाकृष्ण विखे पाटील यांनी मंत्री पदाचा पदभार स्वीकारताच वाळूतस्करी प्रश्नी लक्ष घातले. विखे पाटील यांच्या भूमिकेमुळे वाळू तस्करांमध्ये भीतीचे वातावरण निर्माण झाले आहे.
मंत्री विखे जिल्हाधिकारी आणि अधिकाऱ्यांसह नेवासे तालुक्यातील नुकसानीची पाहणी करत होते या पाहणे दरम्यान त्यांना प्रवरा संगम पासून काही अंतरावर असलेल्या मंगळापुर येथे दोन लोखंडी बोटी दिसून आल्या त्यामुळे त्यांनी आपला ताफा थांबवत बोटी असलेल्या वस्तीवर जात जिल्हाधिकाऱ्यांसह स्थानिक अधिकाऱ्यांना विचारणा केली मात्र समाधानकारक उत्तर न मिळाल्याने संतापलेल्या विखे यांनी स्वतः माहिती घेण्यास सुरुवात केली. यामुळे अधिकाऱ्यांचं वस्तीवरील स्थानिक नागरिकांचे देखील तारांबळ उडाली असल्याचे दिसून आले.
वाळू उपसा करण्यासाठी या बोटीचा वापर होत असल्याचे मंत्री विखे यांच्या लक्षात आल्याने त्यांनी अधिकाऱ्यांनी यापूर्वीच संबंधित बोटी जप्त का केल्या नाही अशी विचारणा केली. यावर निरुत्तर असलेल्या अधिकाऱ्यांकडे कोणतेही उत्तर नव्हते. त्यामुळे त्यांनी तहसीलदार आणि प्रांत अधिकाऱ्यांना कारणे दाखवा नोटीस बजावण्याचे आदेश जिल्हाधिकाऱ्यांना दिले. 
तसेच दोन्ही बोटी जप्त करून संबंधितांवर गुन्हा दाखल करण्याचे आदेश दिले. स्थानिक नागरिकांना विचारणा केली असता त्यांनी देखील माहिती देण्यास टाळाटाळ केल्याने ज्यांची वस्ती आहे त्यांच्यावर देखील गुन्हा दाखल करण्याच्या सूचना पोलीस निरीक्षकांना दिल्या.
मंत्र्याचा रूद्र अवतार पाहून वस्तीवरील रहीवाशी आमच्या बोटी नसल्याचे सांगू लागले. तुमच्या बोटी नाहीतर तुम्ही लावू कशा दिल्या. या प्रश्नांनंतर या रहीवाशांपैकी एका तरुणाने पुढे येवून नावे सांगायला सुरूवात केली. परंतू नावे सांगताना त्याचीही भंबेरी उडाली. पोलीसांनी काही नावे घेवून या तरुणाचा मोबाईल जप्त करून त्याला पुढील माहीतासाठी पोलीस स्टेशनला बोलावून घेतले.
