महाराष्ट्र संवाद न्यूज नेटवर्क
वाळू तस्करी करणारा डंपर पकडल्यानंतर त्याची माहिती मिळूनदेखील कारवाई न करता उलट तस्करांबरोबर संधान साधणाऱ्या धांदरफळचे तलाठी मुळे यांच्यावर कारवाई करण्याची मागणी जनसेवा समता युवक संघटनेचे अध्यक्ष साहेबराव वलवे यांनी करताच प्रांताधिकाऱ्यांनी तातडीने वलवे यांच्या तक्रारीची दखल घेत तहसीलदार अमोल निकम यांना तलाठी मुळे यांच्यावर शिस्तभंगाची कारवाई करण्याचे आदेश दिले आहे.
प्रांताधिकारी डॉ. शशिकांत मंगरुळे यांना यासंदर्भात वलवे यांनी शुक्रवारी एक निवेदन दिले असून त्यात त्यांनी म्हटले की, वलवे गुरुवारी सायंकाळी त्यांच्या गावी जात होते. यावेळी ६ वाजून ४० मिनीटांनी त्यांना भोकनळ वस्तीपासून धांदरफळकडे वाळू तस्करी करणारा एक डंपर जातांना दिसला. त्यांनी याची माहिती प्रांताधिकारी डॉ. मंगरुळे यांना कळविली होती.
त्यानंतर वलवे यांना तलाठी मुळे यांचा फोन आला. त्यांनी वलवे यांना सांगितले की, मी घुलेवाडी फाट्यावर असून तुम्ही संबधीत डंपर थांबवून ठेवा, मी पोहोचतो. मात्र रात्री साडेनऊ वाजेपर्यत कुणीही कारवाईसाठी वलवे यांनी सांगितलेल्या ठिकाणी पोहोचले नाही. संबधीत डंपर चालकाकडे मुदत संपलेला गौणखनिज परवाना असल्याचे वलवे यांच्या निदर्शनास आले. 
त्यामुळे वलवे यांनी तशी कल्पना तलाठी मुळे यांना दिली होती. मात्र मुळे यांनी नंतर फोन बंद करुन उलट वाळू तस्करांबरोबर संधान साधले व त्यांना मदत होईल, अशी भुमिका घेतल्याचे लक्षात आल्यावर वलवे यांनी तशी कल्पना प्रांताधिकारी डॉ. मंगरुळे यांना दिली.
डंपर थांबवून ठेवण्याचा प्रयत्न केला असता चालकाने डंपर वलवे यांच्या अंगावर घालत जीवे मारण्याचा प्रयत्न केला. त्यामुळे त्यांच्यासोबत असलेल्या २०-२५ लोकांवर मोक्का अंतर्गत गुन्हा दाखल करण्यात यावा. कामगार तलाठी मुळे यांना निलंबीत करुन त्यांनी अवैध मार्गाने कमविलेल्या संपत्तीची चौकशी करण्याची मागणी निवेदनाद्वारे वलवे यांनी केली होती.
प्रांताधिकाऱ्यांनी तहसिलदारांना दिले ‘हे’ आदेश
साहेबराव वलवे यांनी व्हॉटस्अपद्वारे तक्रार केली. २७ ऑक्टोंबरला सायंकाळी ६.४१ वाजता निमज येथे वॉश सॅन्डची गाडी अडविलेबाबत कळविले होते. वलवे यांचा संदेश प्राप्त झाल्यानंतर तलाठी मुळे यांना कळवूनही ते घटनास्थळी पोहोचले नाही. वारंवार सांगुनही तलाठी घटनास्थळी पोहोचले नसल्याच्या तक्रारीत तथ्य दिसून येते त्यामुळे सदरच्या घटनेची चौकशी करुन तलाठी यांच्याविरुद्ध शिस्तभंगाची कार्यवाही आपल्या स्तरावर करण्यात यावी. कारवाईचा अहवाल प्रांताधिकाऱ्यांकडे सादर करावा तसेच गौणखनिज परवान्याची वैधता तपासून कायदेशीर कारवाई करण्याचे आदेश प्रांताधिकारी डॉ. शशिकांत मंगरुळे यांनी तहसिलदार अमोल निकम यांना दिले आहे.
