महाराष्ट्र संवाद न्यूज नेटवर्क
प्रश्न विचारणाऱ्या महिला पत्रकारास, “भारत माता ही विधवा नाही त्यामुळे तू आधी कुंकू लाव मगच मी तुझ्याशी बोलतो”, अशा शब्दात महिला पत्रकाराशी वादग्रस्त विधान करत संभाजी भिडे गुरुजींनी आज पुन्हा एकदा वाद ओढवून घेतला आहे.
सातत्याने वादग्रस्त विधाने करत चर्चेत राहणाऱ्या संभाजी भिडे गुरुजींनी आज पुन्हा एकदा महिला पत्रकाराशी बोलताना केलेले वादग्रस्त वक्तव्य चर्चेत आले आहे. त्यांच्या या विधानामुळे महिला वर्गातून संताप व्यक्त होत आहे.
शिवप्रतिष्ठानचे संस्थापक संभाजी भिडे आज मुख्यमंत्री एकनाथ शिंदे यांची भेट घेण्याकरता मंत्रालयात आले होते. त्यानंतर, मुख्यमंत्र्यांशी झालेल्या भेटी संदर्भात संभाजी भिडे गुरुजी यांच्याशी बोलण्याकरता एक महिला पत्रकार पुढे आली. त्यांनी संभाजी भिडे यांना प्रश्न विचारण्यास सुरुवात केली. मात्र, त्यांच्या प्रश्नांना उत्तर देण्याआधी तू आधी कुंकू लाव, मगच तुझ्याशी बोलेन असं प्रतित्युतर संभाजी भिडे यांनी दिलं. प्रत्येक स्त्री भारतमातेस्वरुप असते. भारतामाता ही विधवा नाही. त्यामुळे तू आधी कुंकू लाव, मगच मी तुझ्याशी बोलतो, असं संभाजी भिडे म्हणाले.
महिला पत्रकाराच्या प्रश्नाला उत्तर न देता भिडे गुरुजींनी महिला पत्रकाराचा जाहीर अपमान केल्याने आश्चर्य व्यक्त होत असुन महिला वर्गातून संताप देखील व्यक्त होत आहे. दरम्यान संबंधित महिला पत्रकाराने संभाजी भिडे यांच्या या वक्तव्याचा एक ट्विट करत निषेध केला आहे.
आपल्या ट्विटमध्ये त्या म्हणाल्या, आज माझ्यासोबत घडलेला हा सगळा प्रकार… आपण एखाद्याचं वय बघून त्याला मान देतो, मात्र समोरची व्यक्ती देखील त्या पात्रतेची असावी लागते. मी टिकली लावावी – लावू नये किंवा कधी लावावी हा माझा अधिकार आहे. आपण लोकशाही असलेल्या देशात राहतोय.
दरम्यान भिडे यांनी केलेल्या वक्तव्याची दखल महिला आयोगाकडून घेण्यात आली आहे. आपल्या भूमिके संदर्भात तात्काळ खुलासा करण्याची नोटीस त्यांना बजावण्यात आली आहे. महिला पत्रकाराने तिच्या कपाळावर टिकली लावली नाही म्हणून आपण प्रतिक्रिया देण्यास नकार दिला. स्त्रीचा दर्जा तिच्या कर्तुत्वाने सिद्ध होत असतो. आपले वक्तव्य स्त्री सन्मानाला आणि सामाजिक दर्जाला ठेच पोहोचविणारे आहे, असे आयोगाने म्हटले आहे.
