महाराष्ट्र संवाद न्यूज नेटवर्क
भारतीय जनता पक्षाच्या आक्रमक नेत्या चित्रा वाघ यांच्याकडे पक्षाने मोठी जबाबदारी सोपविली आहे. त्यांची महिला मोर्चाच्या प्रदेशाध्यक्षपदी निवड करण्यात आली आहे. 
भाजप प्रदेशाध्यक्ष चंद्रशेखर बावनकुळे यांनी तसे पत्र वाघ यांना दिले आहे.
महाविकास आघाडीच्या नेत्यांनी केलेल्या आरोपांना प्रत्युत्तर देणे, महिलांचे प्रश्न आक्रमकपणे मांडणे यामुळे त्या भाजपच्या फायर ब्रँड नेत्या म्हणून ओळखल्या जातात. त्यामुळे प्रदेशाध्यक्षपदी निवड करून पक्षाने त्यांच्यावर मोठी जबाबदारी सोपविल्याचे मानले जाते.
याआधी महिला प्रदेशाध्यक्षपदी उमा खापरे काम पाहत होत्या मात्र त्या विधान परिषदेवर निवडून गेल्यानंतर या जागेवर आता वाघ यांना संधी देण्यात आली आहे.
भाजपा प्रदेशाध्यक्ष चंद्रशेखर बावनकुळे यांनी त्यांना दिलेल्या पत्रात म्हटले आहे की, आपली भारतीय जनता पार्टी महिला मोर्चाच्या प्रदेशाध्यक्षपदी निवड करण्यात येत आहे. आपले मनःपूर्वक अभिनंदन. आपण आपल्या संघटन कौशल्याने राज्यभरात भाजपा महिला मोर्चाचे संघटन वाढविण्यासाठी अथक परिश्रम कराल, ही अपेक्षा आहे. आपल्या आगामी कार्यास माझ्या शुभेच्छा.
सोमवारपासून दौरा सुरू करणार
प्रदेशाध्यक्षपदी निवड नंतर चित्रा वाघ यांची प्रतिक्रिया समोर आली आहे. मी पदाला पूर्णपणे न्याय देईल. येणाऱ्या दिवसात पूर्ण ताकतीने काम करेल. तीन वर्ष तुम्ही मला काम करताना बघितले आहे. सिंदखेड राजा येथून मी माझा पहिला दौरा सोमवारपासून सुरू करत आहे. आज मला पक्षाने संधी दिली. मी तुमच्यापेक्षा काही वेगळी नाही. आपल्या सर्वांना आता एकत्रितपणे काम करायचे आहे.
