महाराष्ट्र संवाद न्यूज नेटवर्क
पत्नीचा शारीरिक आणि मानसिक छळ केल्याच्या कारणावरून पतीला नाशिकच्या जिल्हा व सत्र न्यायालयाने दोन वर्ष साध्या कारावासाची शिक्षा सुनावली आहे. राकेश कैलास गायकवाड (रा. हिरावाडी रोड, नाशिक) असे शिक्षा झालेल्या आरोपीचे नाव आहे.
28 एप्रिल 2015 ते 2019 या काळात आरोपी पती राकेश गायकवाडसह सासरे कैलास गायकवाड, सासू शशिकला गायकवाड या संशयितांनी किरकोळ कारणावरून किरकोळ कारणावरून उपाशीपोटी ठेवत विवाहितेचा मानसिक व शारीरिक छळ केल्याची तक्रार आरोपीच्या पत्नीने पंचवटी पोलीस ठाण्यात दाखल केली होती.
या गुन्ह्याचा तपास तत्कालीन सहाय्यक पोलीस निरीक्षक उमा गवळी यांनी करून न्यायालयात आरोपींविरोधात दोषारोप पत्र दाखल केले होते. कोर्ट क्रमांक 8 च्या अतिरिक्त मुख्य न्यायदंडाधिकारी न्यायाधीश प्रतिभा पाटील यांच्या न्यायालयासमोर या खटल्याची सुनावणी सुरू होती. सरकार पक्षाच्या वतीने ॲड. जी. आर. बोरसे यांनी काम बघितले.
सरकार पक्षाच्या वतीने फिर्यादी साक्षीदार आणि पंच यांच्या साक्षी तपास अधिकाऱ्यांनी सादर केलेले पुरावे लक्षात घेत न्यायाधीश पाटील यांनी आरोपी पती राकेश गायकवाड याला दोषी ठरविले. पती गायकवाड याला न्यायालयाने दोन वर्ष साध्या कारावासाची आणि दहा हजार रुपये दंडाची शिक्षा सुनावली आहे.
