महाराष्ट्र संवाद न्यूज नेटवर्क
तब्बल १०१ दिवस तुरुंगात असलेल्या शिवसेना उध्दव बाळासाहेब ठाकरे पक्षाचे नेते खासदार संजय राऊत यांना पत्राचाळ घोटाळा प्रकरणात पीएमएलए कोर्टाने जामीन मंजूर केला आहे. संध्याकाळी त्यांची आर्थररोड कारागृहातून सुटका करण्यात आली. यावेळी कारागृहाबाहेर शिवसैनिक मोठ्या संख्येने उपस्थित होते.
राऊतांची सुटका झाल्याने ठाकरेंच्या नेतृत्वाखालील शिवसेनेत आनंदाचे वातावरण आहे. गळ्यात भगवा गमछा परिधान करुन संजय राऊत आर्थर रोड मध्यवर्ती कारागृहातून बाहेर आले. यावेळी शिवसैनिकांनी एकच जल्लोष केला. त्यामुळे कारागृहाबाहेरील परिसर कोण आला रे कोण आला… शिवसेनेचा वाघ आला… अशा घोषणांनी दुमदुमून गेला होता. बाहेर येताच राऊत यांनी स्वागतासाठी जमलेल्या कार्यकर्त्यांना नमस्कार केला आणि गाडीत बसून गेले.
यावेळी माध्यमांशी बोलतांना राऊत म्हणाले, ‘बाहेर आलोय, बघू आता पुढे काय होतय. आम्ही लढणारे आहोत, लढत राहू. न्यायालयानेच माझी अटक बेकायदेशीर ठरवलीये. कार्यकर्त्यांनी कार्यक्रम ठेवलाय तिकडे जातोय. बाळासाहेबांच्या स्मृतीस्थळी जाणारच आहे.’
दरम्यान राऊत तुरुंगातून सुटल्याने त्यांच्या भांडुप येथील निवासस्थानी डीजे लावण्यात आला. बंगल्यात दसरा, दिवाळीसारखे वातावरण आहे. तेथेही कार्यकर्त्यांची गर्दी आहे. राऊत यांच्या भेटीसाठी शिवसेनाप्रमुख उध्दव ठाकरेही त्यांच्या घरी येण्याची शक्यता व्यक्त होत आहे. राऊतांच्या सुटकेनंतर ट्विटरवर ‘टायगर इज बॅक’ट्रेंड सुरु आहे.
