महाराष्ट्र संवाद न्यूज नेटवर्क
राष्ट्रवादी काँग्रेसचे नेते आणि सध्या मनी लॉन्ड्रीग प्रकरणी तुरुंगात असलेले माजी मंत्री नवाब मलिक यांच्यावर ॲट्रॉसिटीचा गुन्हा दाखल करण्याचे आदेश वाशिम न्यायालयाने दिले आहेत. यामुळे मलिक यांच्यासमोरील अडचणी आणखी वाढल्यात.
एनसीबीचे मुंबई झोनलचे माजी संचालक समीर वानखेडे यांनी मलिक यांनी कुटुंबियांची बदनामी केल्याप्रकरणी याचिका दाखल करण्यात आली होती. या याचिकेवर आज वाशिम सत्र न्यायालयात सुनावणी झाली. त्यानंतर न्यायालयाने वाशिम पोलिसांना मलिक यांच्या विरोधात ॲट्रॉसिटीचा गुन्हा दाखल करण्याचे निर्देश दिले आहे. 
मलिक यांच्या विरोधात वाशिम शहर पोलीस ठाण्यात उद्या हा गुन्हा दाखल होईल. वानखेडे यांच्या आयुष्यातील जुने फोटो आणि पुरावे मलिकांनी त्यांच्या स्वतःच्या सोशल मीडिया वरून प्रसारित केले होते. वानखेडे यांच्या जाती संदर्भातील कागदपत्रेही प्रसिद्ध करत त्यांनी खोट्या कागदपत्रांच्या आधारे नोकरी मिळविल्याचा गंभीर आरोप केला होता.
या विरोधात समीर वानखेडे यांनी मलिक यांच्या विरोधात ॲट्रॉसिटी गुन्हा दाखल करण्याच्या मागणीसाठी याचिका दाखल केली होती. त्यावर न्यायालयाने वरील निर्देश दिले. मलिक यांच्या विरोधात गुन्हा दाखल होणार असल्याने त्यांच्या समोरील अडचणीत आणखी वाढ झाल्याचे मानले जात आहे.
