महाराष्ट्र संवाद न्यूज
राज्याचे शिक्षण मंत्री दीपक केसरकर यांनी विनाअनुदानित शिक्षकांसाठी तब्बल ११६० कोटींचा निधी जाहीर केला आहे. आमच्या या सर्व पाठपुराव्याला, प्रयत्नांना तसेच शिक्षक बांधवांनी केलेल्या आंदोलनाला मिळालेले हे खूप मोठे यश असल्याचे सांगत नाशिक पदवीधर मतदारसंघाचे आमदार डॉक्टर सुधीर तांबे यांनी शिक्षण मंत्र्यांचे आभार मानले आहे.
तांबे म्हणाले, शिक्षकांच्या अनेक वर्ष प्रलंबित असलेल्या प्रश्नांसाठी आझाद मैदानावर सर्व शिक्षक संघटनांनी मोठे आंदोलन केलं होतं. त्या आंदोलनात सामील होत आमदार सुधीर तांबे यांनी सातत्याने विधिमंडळामध्ये शिक्षकांच्या प्रश्नाचा पाठपुरावा चालू होता. तसेच शिक्षण मंत्री दीपक केसरकर यांची भेट घेत यासंदर्भात वारंवार पाठपुरावा केला होता. शिक्षक संघटनांसह आमच्या या सर्व पाठपुराव्याला, प्रयत्नांना तसेच शिक्षक बांधवांनी केलेल्या आंदोलनाला मिळालेले हे खूप मोठे यश असल्याचे सांगत तांबे यांनी मंत्री केसरकर यांची भेट घेतली.
या भेटीत केसरकर यांनी त्रुटी पात्रताधारक शिक्षक, अघोषित शिक्षक व अंशतः अनुदानित शिक्षक त्यांना पुढील टप्पा देण्याची घोषणा केली. तसेच या भेटीत त्रुटीपात्र शिक्षकांवर जो मोठाअन्याय झाला होता, त्यांना एक महिन्यामध्ये निर्णय देऊन पात्र घोषित करण्याचे ठरलेले असताना जवळ जवळ २ वर्षे त्यांचा निर्णय न झाल्यामुळे त्यांना देखील नैसर्गिकरित्या एक पुढचा टप्पा मिळणं आवश्यक असल्याने शिक्षण मंत्र्यांकडे त्रुटीपात्र शिक्षकांना, ज्यांना २० टक्के आहे त्यांना ४० टक्के, ज्यांना ४० टक्के आहे त्यांना ६० टक्के याप्रमाणे अनुदानाचा टप्पा द्यावा यासाठी आग्रह धरला. मा. मंत्री महोदयांनी याविषयी काहीच स्पष्ट मत व्यक्त केले असले तरी शेवटी अंतिमतः पुन्हा तपासून पाहिल असं त्यांनी सांगितलं असल्याचं म्हटलं आहे.
त्याचप्रमाणे झालेल्या निर्णयांची अंमलबजावणी होणं, त्या संदर्भातील जीआर निघणं, तसेच त्या संदर्भातील पुरवणी मागण्यांसाठी आगामी हिवाळी अधिवेशनात तरतूद करणं अत्यंत गरजेचं आहे, याबद्दल शिक्षण मंत्र्यांना विनंती करण्यात आले आहे. सेवा संरक्षण व समायोजन याविषयीचा जीआर काढण्याबद्दलही त्यांच्याकडे आग्रह धरला असता तो त्यांनी मान्य करत लवकरच त्या संदर्भातील जीआर निघेल, असं सांगत शिक्षण मंत्र्यांसोबत शिक्षकांचे प्रश्न विशेषतः ज्युनिअर कॉलेजची वाढीव पदं आणि आयटी यांविषयी चर्चा झाली असल्याचे स्पष्ट केले.
