मुंबई | महाराष्ट्र संवाद न्यूज नेटवर्क
राज्य सरकारने मंगळवारी आयएएस अधिकाऱ्यांच्या बदल्यांचे आदेश काढले. यात अवघ्या दोन महिन्यांपूर्वी राज्याच्या आरोग्य आयुक्तपदी नियुक्ती करण्यात आलेल्या तुकाराम मुंढे, शिर्डी संस्थानच्या मुख्य कार्यकारी अधिकारी भाग्यश्री बानायत यांच्यासह आणखी काही अधिकाऱ्यांचा समावेश आहे. दुपारी काढण्यात आलेल्या आदेशामध्ये तुकाराम मुंढे यांना ‘कार्यमुक्त व्हा आणि पुढील आदेशाची वाट पहा’ असे आदेश देण्यात आले असले तरी, त्यांची नियुक्ती शिर्डी संस्थांनच्या मुख्य कार्यकारी अधिकारीपदी करण्यात आली असल्याचे दैनिक सामनाने म्हटले आहे.
तर शिर्डी संस्थांनच्या कार्यकारी अधिकारी भाग्यश्री बानायत यांची बदली नागपूरला सदस्य सचिव, विदर्भ वैधानिक विकास मंडळ या पदावर करण्यात आली आहे. अवघ्या दोन महिन्यात मुंढे यांची बदली करण्यात आली असून सोळा वर्षात त्यांच्या अठराहून अधिक बदल्या झाल्या आहेत. तर दीड वर्षात बानायत यांची बदली करण्यात आली आहे.
अन्य बदल्या झालेले अधिकारी व त्यांना मिळालेले नियुक्तीचे ठिकाण पुढील प्रमाणे
डॉ. व्ही. एन. सूर्यवंशी अतिरिक्त आयुक्त MMRDA, मुंबई यांची आयुक्त, उत्पादन शुल्क, मुंबई म्हणून नियुक्ती करण्यात आली आहे.
भाग्यश्री बानायत मुख्य कार्यकारी अधिकारी, श्री साईबाबा संस्थान ट्रस्ट, शिर्डी यांची सदस्य सचिव, विदर्भ वैधानिक विकास मंडळ, नागपूर म्हणून नियुक्ती करण्यात आली आहे.
विनय सदाशिव मून मुख्य कार्यकारी अधिकारी, जिल्हा परिषद, भंडारा यांची मुख्य कार्यकारी अधिकारी, जिल्हा परिषद परभणी या पदावर नियुक्ती करण्यात आली आहे.
सुनील एस. चव्हाण यांची नियुक्ती आयुक्त, कृषी, पुणे म्हणून करण्यात आली आहे.
एस. एम. कुर्तकोटी यांची मुख्य कार्यकारी अधिकारी, जिल्हा परिषद भंडारा म्हणून नियुक्ती करण्यात आली आहे.
श्रीमती सौम्या शर्मा सहाय्यक जिल्हाधिकारी, देगलूर उपविभाग नांदेड यांची मुख्य कार्यकारी अधिकारी, जिल्हा परिषद नागपूर या पदावर नियुक्ती करण्यात आली आहे.
शिर्डी देवस्थानच्या मुख्य कार्यकारी अधिकारी बानायत यांनी गेल्या दीड वर्षांमध्ये अनेक धाडसी निर्णय घेतले होते. ग्रामस्थ व प्रशासन यांच्यामध्ये दरी निर्माण झालेली होती, त्यामध्ये मार्ग काढून शिर्डी देवस्थानचा कारभार चांगल्या पद्धतीने करण्यासाठी त्यांनी पुढाकार घेतला होता. त्यासाठी त्यांनी सातत्याने प्रयत्न केले. देवस्थानामध्ये प्रशासकीय शिस्तही त्यांनी चांगल्या पद्धतीने लावली होती.
तर अवघ्या दोन महिन्यात बदली झालेल्या तुकाराम मुंढे यांनी आपल्या कडक शिस्तीतून आरोग्य विभागाच्या कारभार सुधारण्याचा प्रयत्न केला. त्यांच्या नियुक्तीचा आरोग्य विभागातील अधिकारी कर्मचाऱ्यांनी चांगलाच धसका घेतला होता. मुंढे यांच्या कार्यकाळात आरोग्य विभागाला शिस्त लागून रुग्णांना सेवा मिळेल असा आशावाद निर्माण झालेला असतानाच अचानकपणे त्यांच्या बदलीचे आदेश राज्य शासनाने काढले आहेत त्यांना नवीन नियुक्तीचे ठिकाण दिलेले नसले तरी त्यांची नियुक्ती शिर्डी संस्थानाच्या मुख्य कार्यकारी अधिकारी पदी झाल्याचे वृत्त दैनिक सामनाने दिले आहे.
