अकोले | महाराष्ट्र संवाद न्यूज नेटवर्क
अहमदनगर मधील शासकीय औद्योगिक प्रशिक्षण संस्थेत आयोजित करण्यात आलेल्या जिल्हास्तरीय तंत्र प्रदर्शनात सहभागी झालेल्या २७ शासकीय व खासगी औद्योगिक प्रशिक्षण संस्थांमधून अकोले तालुका एज्युकेशन सोसायटी संचलित औद्योगिक प्रशिक्षण संस्थेच्या उपकरणाने यश मिळविले आहे. या उपकरणाची विभागीय पातळीवर होणाऱ्या तंत्र प्रदर्शनासाठी निवड करण्यात आली असल्याची माहिती अकोले आयटीआयचे प्राचार्य विद्याचंद्र सातपुते यांनी दिली.
कौशल्य विकास, रोजगार, उद्योजकता व नाविन्यता विभाग, व्यवसाय शिक्षण व प्रशिक्षण संचालनालय मुंबई आणि शासकीय औद्योगिक प्रशिक्षण संस्थेच्या वतीने या प्रदर्शनाचे उद्योजक किशोर कुलकर्णी यांच्या हस्ते उद्घाटन झाले. प्रदर्शनामध्ये विद्यार्थ्यांनी कृषी, पारंपारिक ऊर्जा, पाणीबचत, फॅशन, खाद्यपदार्थ, यांत्रिक मॉडेल्स यावर आधारित जवळपास ७० उपकरणे मांडण्यात आली होती.
अभियांत्रिकी गटामध्ये अकोले तालुका आयटीआय संस्थेच्या ‘हँडी मल्चिंग मशीन’या शेतकऱ्यांसाठी उपयुक्त ठरणाऱ्या उपकरणाची नासिक येथे एक डिसेंबरला होणाऱ्या विभागीय पातळीवरील प्रदर्शनासाठी निवड करण्यात आली आहे. प्रदर्शनात द्वितीय क्रमांक मिळविलेले हे उपकरण वेल्डर निदेशक बाबासाहेब धुमाळ यांच्या मार्गदर्शनाखाली ओम साबळे यांच्यासह अन्य विद्यार्थ्यांनी बनविले होते.
अकोले आयटीआयच्या या यशाबद्दल संस्थेचे कार्यकारी विश्वस्त माजी मंत्री मधुकरराव पिचड, विश्वस्त माजी आमदार वैभव पिचड, गिरीजाजी जाधव, सुरेश कोते, संपतराव वैद्य, मधुकरराव सोनवणे संस्थेचे अध्यक्ष अभियंता सुनील दातीर, सुधाकर देशमुख, धनंजय संत, व्यवस्थापन समितीचे अध्यक्ष यशवंतराव आभाळे, ॲड. आनंदराव नवले, डॉ. डी. के. सहाणे, कल्पना सुरपुरीया, शरद देशमुख, सुधाकर आरोटे, रमेश जगताप, मच्छिंद्र धुमाळ, शिक्षणाधिकारी संपतराव मालुंजकर, उद्योजक माणिकराव डावरे आदींनी अभिनंदन केले आहे.
