महाराष्ट्र संवाद न्यूज
लहान बालकांमध्ये राज्यभरात गोवरचा प्रादुर्भाव वाढत आहे. या पार्श्वभूमीवर संगमनेरमध्ये गोवर लसीकरण व गोवर आजार रोखण्यासाठी प्रतिबंधात्मक उपाय योजना करण्यात यावी, अशी मागणी संगमनेर नगर परिषदेच्या मुख्याधिकाऱ्यांकडे करण्यात आली आहे.
संगमनेर मधील सामाजिक कार्यकर्ते आणि नवभारत माहिती अधिकार पत्रकार संरक्षण पोलीस मित्र फाउंडेशनचे संगमनेर शहराध्यक्ष मन्सूर चांदभाई शेख यांनी मुख्याधिकाऱ्यांना या संदर्भात दिलेल्या निवेदनात म्हटले आहे की, मुंबईसह राज्याच्या अनेक जिल्ह्यांमध्ये गोवरचा उद्रेक झाला आहे. राज्यभरात बालकांमध्ये गोवर साथीचा उद्रेक मोठ्या प्रमाणात सुरू आहे. नवजात बालकापासून पाच वर्षे वयोगटातील बालकांना याचा सर्वाधिक धोका आहे. यात अनेक बालकांचा मृत्यू देखील झाला आहे.
त्यामुळे संगमनेर शहरासह तालुक्यात सर्वत्र लहान बालकांचे लसीकरण करण्यात यावे. कोरोना पेक्षा पाचपट वेगाने लहान बालकात गोवरची साथ पसरत आहे. ही साथ पसरू नये, यासाठी प्रशासकीय पातळीवर सर्वतोपरी प्रयत्न केले जात असले तरी या साथीचा वाढता उद्रेक पाहता संगमनेर तालुक्यात गावागावात लसीकरणासाठी प्रचार व प्रसार करण्यात यावा.
लहान मुलांसोबतच आता मोठ्या व्यक्तीमध्येही गोवरचे रुग्ण आढळू लागले आहेत त्यामुळे ही साथ झपाट्याने वाढत आहे मुंबईसह नागपूर नाशिक अकोल्यातही हे रुग्ण आढळले असल्याने शहरासह तालुक्यात आरोग्य विभागाने घरोघर जाऊन बालकांच्या लसीकरणासाठी जनजागृती करण्याची आवश्यकता असल्याचे त्यांनी म्हटले आहे.
