महाराष्ट्र संवाद न्यूज नेटवर्क
संगमनेर : संगमनेर तालुक्यातील चिखली येथील नूतन माध्यमिक विद्यालयात पार पडलेल्या तालुकास्तरीय गणित विज्ञान प्रदर्शनामध्ये देवगड विद्यालयातील नववी मध्ये शिकणाऱ्या अनुराधा शांताराम वर्पे या विद्यार्थ्यांनीच्या गणितीय शैक्षणिक खेळणी उपकरणाने प्रथम क्रमांक मिळविला.
५ व ६ जानेवारीला पार पडलेल्या या प्रदर्शनात अनुराधा वर्पे हिने गणितीय शैक्षणिक खेळणी यामध्ये संच म्हणजे काय, कोनांच्या जोड्या, घनफळ काढणे याची प्रतिकृती तयार केली होती .सदर उपकरणासाठी तिला तीस रुपये खर्च आला होता.
तालुकास्तरीय विज्ञान-गणित प्रदर्शनापूर्वी देवगड विद्यालयात विद्यार्थ्यांमध्ये वैज्ञानिक दृष्टिकोन आणि त्याला अनुसरून निर्माण होणाऱ्या कलाकृतींना सादरीकरणाची संधी मिळावी आणि यातून संशोधनाची आवड निर्माण व्हावी यासाठी, आंतरशालेय विज्ञान-गणित प्रदर्शन भरवण्यात आले होते. या प्रदर्शनात ७२ विद्यार्थ्यांनी आपले उपकरण सादर केले. यातून आठ विज्ञान व गणित उपकरणांची निवड करून ते तालुका प्रदर्शनात पाठवण्यात आले होते.
प्रदर्शनात प्रथम क्रमांक मिळविणारी अनुराधा शांताराम वर्पे तसेच सहभागी विद्यार्थी, मार्गदर्शक वसंत नेहे यांचे जनता शिक्षण प्रसारक मंडळाचे सर्व पदाधिकारी, हिवरगाव पावसाचे सरपंच, उपसरपंच, संस्थांचे पदाधिकारी, पालक, ग्रामस्थ , माजी विद्यार्थी, मुख्याध्यापक, शिक्षक व शिक्षकेतर कर्मचारी यांच्यावतीने अभिनंदन करण्यात आले आहे.
