खुनाच्या आरोपावरून अटकेत असलेल्या आरोपीची न्यायालयाने केली मुक्तता

महाराष्ट्र संवाद न्यूज नेटवर्क
संगमनेर : व्याजाचे पैसे मागितल्याच्या कारणातून झालेल्या बाचाबाचीची परिणती खुनामध्ये झाली होती. खुनाच्या आरोपावरून अटकेत असलेल्या आरोपीची न्यायालयाने मुक्तता केली आहे. तसेच तुरुंगात असलेल्या आरोपीला तात्काळ सोडण्याचे आदेश संगमनेरचे जिल्हा व अतिरिक्त सत्र न्यायाधीश वाय. पी. मनाठकर यांनी दिले आहे.
तुकाराम बुधा उघडे रा. उंचखडक खुर्द, ता. अकोले याने गावातील कैलास यशवंत घोडके याला नऊ ते दहा वर्षांपूर्वी व्याजाने दहा हजार रुपये दिले होते. घोडके याने ही रक्कम उघडे यांना परत केली होती. मात्र त्यावरील व्याज दिलेले नव्हते, त्यामुळे तुकाराम उघडे हे घोडके यांच्याकडे व्याजाची मागणी करत असत. १ ऑगस्ट २०२० रोजी संध्याकाळी साडेसहा वाजण्याच्या सुमारास गावातील बस स्टँडवर व्याजाच्या पैशावरून वाद झाले. या वादात आरोपी कैलास घोडके याने खाली पडलेली वीट उचलून ती तुकाराम उघडे यांच्या डोक्यात मारली होती. तुकाराम उघडे यांना काही लोकांनी अकोले येथील ग्रामीण रुग्णालयात उपचारासाठी नेले होते.
मात्र तत्पूर्वीच त्यांचा मृत्यू झाल्याचा अहवाल वैद्यकीय अधिकाऱ्यांनी दिला होता. यासंदर्भात मृताचा भाऊ नामदेव बुधा उघडे याने अकोले पोलीस ठाण्यात दिलेल्या फिर्यादीवरून आरोपी कैलास घोडके यांच्या विरोधात खुनाचा आणि अनुसूचित जाती जमाती अत्याचार प्रतिबंधक कायद्यान्वये गुन्हा दाखल करण्यात आला होता.
पोलिसांनी आरोपी घोडके याला अटक करून त्याच्या विरोधात न्यायालयात आरोप पत्र दाखल केले होते. आरोपी घोडके याने त्याच्यावरील आरोप नाकारले. संगमनेरच्या अतिरिक्त सत्र न्यायालयात या खटल्याची सुनावणी दोन वर्षांपासून सुरू होती. न्यायाधीश वाय. पी. मनाठकर यांच्यासमोर चाललेल्या या खटल्यात आरोपी विरोधात दोषारोप सिद्ध करण्यासाठी सरकार पक्षाच्या वतीने पाच साक्षीदार तपासण्यात आले होते.
न्यायालयासमोर सरकार पक्षाला आरोपी विरोधात दोषारोप सिद्ध करता आले नाही. न्यायालयासमोर आलेल्या साक्षी पुराव्यांचा विचार करत न्यायाधीश वाय. पी. मनाटकर यांनी आरोपी कैलास यशवंत घोडके याची सर्व आरोपातून मुक्तता केली आहे. तसेच तुरुंगात असलेल्या आरोपीला तात्काळ सोडण्याचे आदेश संबंधितांना देण्यात आले आहे.