महाराष्ट्र संवाद न्यूज नेटवर्क
पुण्यासारख्या मोठ्या शहरात होणारी महसूल परिषद यावर्षी पुण्यामध्ये न होता महसूल मंत्री राधाकृष्ण विखे पाटील यांच्या पुढाकारातून पहिल्यांदाच ग्रामीण भागात लोणी येथील मेडिकल कॉलेजमध्ये होत आहे.
महसूल विभागातील अधिकाऱ्यांना नवीन कायदे आणि सरकारी धोरणाबाबत प्रशिक्षण देण्यासाठी दरवर्षी महसूल परिषद घेतली जात असते. यावर्षी येत्या 22 आणि 23 फेब्रुवारी असे दोन दिवस ही परिषद होत असून या परिषदेचे उद्घाटन मुख्यमंत्री एकनाथ शिंदे यांच्या हस्ते होणार आहे. तर समारोप उपमुख्यमंत्री देवेंद्र फडणवीस यांच्या उपस्थितीत होईल.
महसूल विभागाच्या वतीने या परिषदेचे आयोजन करण्यात आले असून राज्याचे महसूल मंत्री राधाकृष्ण विखे पाटील दोन्ही दिवस या परिषदेला उपस्थित राहणार आहे. याशिवाय महसूल विभागाच्या अप्पर मुख्य सचिवांपासून सर्व महसूल विभागाचे आयुक्त, राज्यातील 36 जिल्हाधिकारी, 36 अप्पर जिल्हाधिकारी, जमाबंदी आयुक्त, नोंदणी महानिरीक्षक, मंत्रालयातील महसूल विभागाचे सर्व उपसचिव, काही विभागांचे अप्पर मुख्य सचिव आणि प्रधान सचिव असे जवळपास राज्यातील शंभराहून जास्त अधिकारी या परिषदेला उपस्थित राहतील.
शासनाकडून दिले जाणारे प्रशिक्षणाचे कार्यक्रम हे पुण्यातील यशदा या संस्थेमध्ये होत असतात. त्यामुळे आत्तापर्यंत महसूल परिषदेचे आयोजनही यशदामध्येच केले जात होते. महसूल अधिकाऱ्यांना पुणे मुंबई येथे होणारे प्रशिक्षण कार्यक्रम सोयीचे वाटत असते. जाण्या-येण्याची सोय राहण्याची व्यवस्था या दृष्टीने पुण्याची निवड केली जाते. मात्र यावेळी महसूल मंत्री विखे यांनी हा प्रघात मोडून यशदा ऐवजी अहमदनगर जिल्ह्यात थेट आपल्या लोणी गावातील प्रवरा इन्स्टिट्यूट ऑफ मेडिकल सायन्स या संस्थेत परिषदेचे आयोजन केले आहे.
महसूल खात्याचा संबंध हा बहुतांशी शेतीशी येतो, पुण्या मुंबईत बसणाऱ्या आयुक्त आणि सचिव दर्जाच्या अधिकाऱ्यांनी यानिमित्ताने ग्रामीण भागात येऊन तळागाळातील महसूल कर्मचाऱ्यांशी संवाद साधने अपेक्षित आहे. शेतकरी आणि सामान्य माणसाला सातत्याने भेडसावणाऱ्या समस्या या निमित्ताने सोडविणे सोपे जाईल हा या मागचा हेतू असल्याचे सांगितले जाते.
मंत्री विखे पाटील हे नेहमी आपल्या आगळ्यावेगळ्या कार्यशैलीसाठी परिचित आहेत. याच दृष्टिकोनातून त्यांनी हा निर्णय घेतला आहे. परिषदेसाठी येणाऱ्या अधिकाऱ्यांची राहण्याची गैरसोय टाळण्यासाठी त्यांची शिर्डीतील पंचतारांकित हॉटेलमध्ये व्यवस्था करण्यात आली आहे. यानिमित्ताने राज्यातील महसूल अधिकाऱ्यांना साई दर्शन देखील होईल.
