महाराष्ट्र संवाद न्यूज
पोलीस अधिकारी असूनही भर रस्त्यात गुंडा सारखे वर्तन करत महिलेला मारहाण करण्याचे प्रकरण सुपा पोलीस ठाण्याच्या पोलीस निरीक्षकाच्या चांगलेच अंगलट आले आहे. जिल्हा पोलीस अधीक्षकांनी जिल्ह्यातील पोलीस दलात फेरबदल करताना या निरीक्षकाची उचल बांगडी केली होती. मात्र आता काही तासातच पोलीस निरीक्षक गोकावे याचे मुख्यमंत्री एकनाथ शिंदे, उपमुख्यमंत्री तथा गृहमंत्री देवेंद्र फडणवीस यांनी निलंबन केल्याची माहिती समोर येत आहे.
मंगळवारी सुपा टोल नाक्यावर पोलीस निरीक्षक गोकावे यांनी एका महिलेला बेदम मारहाण करण्याचा प्रकार घडला होता. याबाबतचे सीसीटीव्ही फुटेज समाज माध्यमात व्हायरल झाल्यानंतर अहमदनगर मधील दैनिक ‘नगर सह्याद्री’ने या प्रकरणाला वाचा फोडली होती. राज्यभर या प्रकरणाने खळबळ उडाली होती.
भारतीय जनता पक्षाच्या महिला आघाडीच्या प्रमुख चित्रा वाघ यांनी देखील या प्रकरणाची गंभीर दखल घेत याची माहिती मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या निदर्शनास हा प्रकार आणला होता. याची दखल शिंदे-फडणवीस सरकारला घ्यावी लागली. पोलीस निरीक्षक नितीनकुमार गोकावे यांचे निलंबन करण्याचा निर्णय मुख्यमंत्री एकनाथ शिंदे उपमुख्यमंत्री देवेंद्र फडणवीस यांनी तात्काळ घेतला.
भाजप नेत्या चित्रा वाघ यांनी यासंबंधीची माहिती दिली. त्या म्हणाल्या, अहमदनगर जिल्ह्यातील सुपा येथे मंगळवारी अतिशय संताप जनक घटना घडली. सुप्याचा पीआय गोकावे याने एका महिलेला भर रस्त्यात मारहाण केली. या घटनेचे तात्काळ दखल घेत शिंदे फडणवीस सरकारने संबंधित पोलीस निरीक्षक गोकावे याला सस्पेंड केले आहे.
महाराष्ट्रात महिला आणि मुलींकडे वाकड्या नजरेने बघणाऱ्यांची गय केली जाणार नाही. शिंदे-फडणवीस सरकारमध्ये भयमुक्त आणि भीती मुक्त महाराष्ट्राचे दर्शन होताना दिसते. यापूर्वी देखील बऱ्याच घटनांमध्ये दोन डझनहून अधिक पोलिस अधिकाऱ्यांना सस्पेंड करण्याचे काम शिंदे-फडणवीस सरकारने केले आहे. महाराष्ट्राच्या मातृशक्तीकडून शिंदे-फडणवीस सरकारचे आभार.
