महाराष्ट्र संवाद न्यूज
पतसंस्थेच्या थकीत कर्जदारांना कर्ज वसुलीची नोटीस बजावणीचे कलम 101 प्रमाणे प्रमाणपत्र देण्याच्या मोबदल्यात पंधरा हजार पाचशे रुपयांची लाच स्वीकारणाऱ्या सहकारी संस्थेच्या सहाय्यक निबंधकाला लाच लुचपत प्रतिबंधक विभागाच्या अधिकाऱ्यांनी पकडले आहे.
लाच लुचपत विभागाकडे तक्रार करणारे तक्रारदार हे पाथरे बुद्रुक ता. सिन्नर जि. नाशिक येथील साई लक्ष्मी ग्रामीण बिगर शेती सहकारी पतसंस्थेत वसुली विभागात काम करतात. थकीत कर्जदारांवर संस्थेमार्फत कलम 101 प्रमाणे कारवाई करण्यासाठी सहकार विभागाचे प्रमाणपत्र आवश्यक असते.
सिन्नरच्या सहकारी संस्थेचे सहाय्यक निबंधक एकनाथ प्रताप पाटील यांनी या प्रमाणपत्रासाठी एका नोटीस करिता प्रत्येकी दीड हजार रुपयांची मागणी केली होती. सतरा नोटीस करिता पाटील यांनी पंचवीस हजार पाचशे रुपयांची मागणी केली होती.
या संदर्भात तक्रारदाराने नाशिकच्या लाच लुचपत विभागाशी संपर्क साधत तक्रार दिली होती. लाच लचपतच्या पोलीस अधीक्षक शर्मिष्ठा घारगे-वालावलकर, अप्पर पोलीस अधीक्षक एन. एस. न्याहाळदे, वाचक पोलीस उपाधीक्षक नरेंद्र पवार, पोलीस उपाधीक्षक अभिषेक पाटील यांच्या मार्गदर्शनाखाली पोलीस निरीक्षक संदीप साळुंखे यांच्या नेतृत्वाखाली सहाय्यक फौजदार सुखदेव मुरकुटे, पोलीस हवालदार पंकज पळशीकर, पोलीस नाईक मनोज पाटील यांच्या पथकाने पाटील याला पंधरा हजार पाचशे रुपयांची लाच स्वीकारताना गुरुवारी पकडले.
पाटील याने स्वीकारलेली लाचेची रक्कम पथकाने ताब्यात घेतली आहे. पाटील याच्या विरोधात पोलीस ठाण्यात गुन्हा दाखल करण्याचे काम सुरू होते.
▶️ आवाहन
सर्व नागरीकांना आवाहन करण्यात येते की, त्यांच्याकडे कोणत्याही शासकीय अधिकारी, कर्मचारी यांनी किंवा त्यांच्यावतीने खाजगी इसमाने त्यांचे कोणतेही शासकीय काम करून देण्यासाठी लाचेची मागणी केल्यास तात्काळ टोल फ्री क्रमांक १०६४ वर संपर्क साधावा, असे आवाहन नाशिक अँन्टी करप्शन ब्युरोच्यावतीने करण्यात आले आहे.
