महाराष्ट्र संवाद न्यूज
रिव्हॉल्वरचा धाक दाखवून पेट्रोल पंपावरील अडीच लाख रुपयांचे लूट करणारे, पंचर दुकानदारावर हल्ला करून त्याचे मोटरसायकल लांबविणारे तीन गुन्हेगार नगरच्या स्थानिक पुणे शाखेला पकडण्यात यश आले. पेट्रोल पंपावरील लुटी सोबतच नगरच्या कोतवाली पोलीस ठाण्याच्या हद्दीतील एका खून प्रकरणाचाही उलगडा या आरोपींकडून करण्यात पोलिसांना यश आले आहे.
गेल्या रविवारी (ता. २६ फेब्रुवारी) संगमनेरच्या पठार भागात साकुर मांडवे रस्त्यावरील भगवान पेट्रोलियम या पेट्रोल पंपावर तिघा सशस्त्र चोरट्यांनी आपल्याकडील दोन्ही दुचाकीमध्ये पेट्रोल भरत पेट्रोल पंपावरील केबिनमध्ये घुसून तेथील कर्मचाऱ्यांना रिव्हॉल्वरचा धाक दाखवून अडीच लाखाची लूट केली होती.
तत्पूर्वी याच आरोपींनी माहूली गावच्या शिवारात एका पंचर दुकानदाराला रिव्हॉल्वरचा धाक दाखवत त्याच्यावर चाकू हल्ला करत त्याला जखमी केले. त्याच्याकडील रोकड आणि मोटर सायकल घेऊन पोबारा केला होता त्यानंतर या तिघांनीही पेट्रोल पंपावर लूट केली असल्याचे समोर आले होते. या दोन्ही घटने संदर्भात घारगाव पोलीस ठाण्यात गुन्हे दाखल करण्यात आले होते.
या घटनेच्या अनुषंगाने स्थानिक घारगाव पोलीस, अहमदनगरच्या गुन्हे शाखेचे पोलीस तपास करत होते. तपासांती पोलिसांना या प्रकरणात राहुरी येथील गुन्हेगारांचा सहभाग असल्याची माहिती मिळाली होती. त्यामुळे पोलीस या संशयित तीनही गुन्हेगारांच्या मागावर होते. ते घरी परतल्याची माहिती मिळतच मागावर असलेल्या पोलीस पथकाने छापा टाकत तिघांनाही ताब्यात घेतले आहे. गुन्हे शाखेच्या पोलिसांनी केलेल्या चौकशीअंती आरोपींनी साकुर मांडवे रस्त्यावरील भगवान पेट्रोल पंप लुटल्याचे, माहुली येथील पंचर दुकानदारावर हल्ला करून त्याची मोटार सायकल नेल्याचे कबूल केले.
तसेच चौकशीमध्ये आणखी एक धक्कादायक बाब समोर आली असून आरोपींनी गतवर्षी कोतवाली पोलीस ठाण्याच्या हद्दीमध्ये बाह्यवळण मार्गावर केलेल्या एका खून प्रकरणाचा उलगडा करण्यात गुन्हे शाखेच्या पोलीस पथकाला यश आले आहे. आरोपीची गुन्हे शाखेचे पथक कसून चौकशी करत असून चौकशीअंती आरोपींना तोफखाना (अहमदनगर) आणि घारगाव (संगमनेर) पोलिसांच्या ताब्यात दिले जाणार असल्याची माहिती मिळते.
