महाराष्ट्र संवाद न्यूज
ठेकेदाराच्या बिलामध्ये त्रुटी न काढता बिल मंजुरीसाठी तब्बल पाच लाख रुपयांच्या लाचेची मागणी करून त्यापैकी दोन लाख रुपयांचा पहिला हप्ता स्वीकारणाऱ्या महावितरणच्या व्यवस्थापक आणि उपव्यवस्थापकाला लाच लूचपतच्या पथकाने पकडले आहे.
अमर अशोक खोंडे (वय ४१, व्यवस्थापक वित्त व लेखा विभाग, महाराष्ट्र राज्य वीज वितरण कंपनी, धुळे (वर्ग – १), रा. प्लॉट नंबर १४ अशोकनगर, जमनागिरी रोड, धुळे) आणि मनोज अरुण पगार (वय 46, उप व्यवस्थापक वित्त व लेखा विभाग, महाराष्ट्र राज्य वीज वितरण कंपनी, धुळे (वर्ग – २), रा. विवेकानंद कॉलनी, करगाव रोड, चाळीसगाव) अशी दोघा लाचखोर अधिकाऱ्यांची नावे असून लाच लुचपत विभागाच्या धुळे युनिटने ही यशस्वी कामगिरी केली आहे.
यासंदर्भात अधिक माहिती अशी, नंदुरबार येथील तक्रारदार शासकीय नोंदणीकृत ठेकेदार असून त्यांनी महाराष्ट्र राज्य वीज वितरण कंपनी अंतर्गत जिल्हा नियोजन योजनेमध्ये धुळ्याच्या मंडळ कार्यालयात अंतर्गत वीज जोडणी संदर्भात २०१८-१९ या वर्षात ठेका घेऊन ५६,३१,५९०/- रुपयांचे काम पूर्ण केले होते. त्या कामाची बिले त्यांनी संबंधितांकडे सादर केले होती.
सादर केलेल्या या बिलामध्ये कोणत्याही प्रकारचे त्रुटी न काढता सदर प्रलंबित बिल मंजूर करण्याच्या मोबदल्यात दोघा आरोपी लोकसेवकांनी तक्रारदाराकडे पाच लाख रुपये लाचेची मागणी केली होती. तडजोडीअंती अडीच लाख रुपयात काम करण्याचे ठरले. तक्रारदाराने यासंदर्भात लाच लुचपतच्या धुळे विभागाशी संपर्क करत यासंदर्भात माहिती दिली.
लाच लुचपत विभागाच्या पोलीस अधीक्षक शर्मिष्ठा वालावलकर-घार्गे, अप्पर पोलीस अधीक्षक नारायण न्याहाळदे, वाचक पोलीस उपाधीक्षक नरेंद्र पवार यांच्या मार्गदर्शनाखाली सापळा अधिकारी धुळे विभागाचे पोलीस उपाधीक्षक अनिल बडगुजर, सहाय्यक सापळा अधिकारी पोलीस निरीक्षक प्रकाश झोडगे यांच्या नेतृत्वाखाली सापळा पथकातील शरद काटके, संतोष पावरा, भूषण खलाणेकर, भूषण शेटे, गायत्री पाटील, सुधीर मोरे, रामदास बारेला, मकरंद पाटील, प्रशांत बागुल, रोहिणी पवार, वनश्री बोरसे या कर्मचाऱ्यांनी ठरलेल्या लाचेच्या पहिल्या त्याच्या स्वरूपात अमर खोंडे यांनी मनोज पवार याच्या उपस्थितीत तक्रारदाराकडून पहिल्या हप्त्याच्या स्वरूपात दोन लाख रुपये स्वीकारताना रंगेहात पकडले.
