महाराष्ट्र संवाद न्यूज
संगमनेर:
संस्था आणि बँकेच्या व्यवहारावरून संगमनेरमध्ये एका डॉक्टरला चौघा जणांनी बेदम मारहाण केल्याचा प्रकार शहरातील लिंक रोड भागात घडला असून या मारहाणीत डॉक्टरच्या पायाच्या गुडघा फ्रॅक्चर झाला आहे. संबंधित डॉक्टरवर रुग्णालयात उपचार सुरू आहेत.
याबाबत खोपट (ठाणे) येथे वैद्यकीय व्यवसाय करणारे डॉ. वसीम करीम तांबोळी यांनी उपचारादरम्यान संगमनेर शहर पोलीस ठाण्यात रईश अहमद शेख बेपारी, अदनान मन्सूर बेपारी, जुबेर आयुब सय्यद आणि फिरोज गुलाब बागवान यांच्या विरोधात दिलेल्या तक्रारीवरून गुन्हा दाखल करण्यात आला आहे.
तांबोळी यांनी आपल्या तक्रारीत म्हटले आहे की, त्यांचे कुटुंबीय समनापुर येथे राहत असून त्यांच्या वडिलांनी अलाईड एज्युकेशन सोसायटी समनापुर अंतर्गत नॅशनल इंग्लिश स्कूल संगमनेर या संस्थेची स्थापना केली आहे. या संस्थेचे सर्व व्यवहार माझ्या नावावर होतात. या अनुषंगाने रईश अहमद शेख (बेपारी) याने आमच्या संस्थेत फेरफार केल्याने न्यायालयात दिवानी दावे दाखल केलेले आहेत. लिंक रोड येथील एचडीएफसी बँकेत असलेल्या इंग्लिश मीडियम स्कूलच्या खात्यातून सात लाख रुपये १६ मार्चला काढल्यासंबंधी माहिती समजली.
त्यामुळे शुक्रवारी (१७ मार्च) डॉ. तांबोळी भाऊ कासिम आणि चुलते नजीर इस्माईल तांबोळी यांच्यासोबत एचडीएफसी बँकेत शाळेच्या खात्यावरील रकमे संदर्भात चौकशी करण्याकरिता आले होते. बँक व्यवस्थापकाशी चर्चा करत असताना दुपारी अडीच वाजण्याच्या सुमारास रईश अहमद शेख हा तेथे आला व मी ते पैसे काढले असून सध्या सदर खाते माझ्या नावावर आहे. मी भाऊ व चुलता यांना समजावून सांगत असताना त्याचा राग येऊन त्याने आम्हाला शिवीगाळ केली व मला धक्काबुक्की करीत बँकेबाहेर ओढत घेऊन आला.
त्यावेळी तेथे अदनान मन्सूर बेपारी, जुबेर आयुब सय्यद आणि फिरोज गुलाब बागवान यांनी मला शिवीगाळ करुन लाथाबुक्याने मारहाण केली. यावेळी भाऊ आणि चुलते मला सोडविण्यास आले असताना त्यांना देखील शिवीगाळ व लाथाबुक्क्याने मारहाण करण्यात आली. त्यादरम्यान माझ्या डाव्या पायाच्या गुडघ्यावर रईश अहमद शेख (बेपारी) याने लोखंडी रॉडने जोरात मारले. त्यामुळे डॉक्टर तांबोळी यांच्या डाव्या पायाचा गुडघा फ्रॅक्चर झाला अशा आशयाच्या जबाबावरून चौघा जणांविरोधात गुन्हा दाखल करण्यात आला असून पुढील तपास पोलीस नाईक गायकवाड करीत आहेत.
