महाराष्ट्र संवाद न्यूज
मावळत्या आर्थिक वर्षासाठी जिल्हाधिकारी कार्यालयाने संगमनेर तालुक्याला दिलेले महसूल वसुलीचे उद्दिष्ट पूर्ण करतानाच तालुक्याने महसूल वसुलीचा नवा उच्चांक तयार केला आहे. २०२२-२३ या आर्थिक वर्षात संगमनेर तालुक्याची १४१% वसुली झाली असल्याची माहिती तहसीलदार अमोल निकम यांनी दिली.
कोरोना महामारीनंतर अर्थव्यवस्था पुन्हा वेग घेताना दिसत आहे. २०२२-२३ या आर्थिक वर्षासाठी संगमनेर विभागाला १५ कोटी ६९ लक्ष रुपयांचे उद्दिष्ट देण्यात आले होते. ३१ मार्च अखेर हे उद्दिष्ट ओलांडत संगमनेर तहसीलने तब्बल २२ कोटी २० लाख रुपयांची महसूल वसुली केली आहे. टक्केवारी मध्ये हा आकडा १४१% इतका आहे. गत आर्थिक वर्षात देखील संगमनेर तालुका महसूल विभागाने १२५% वसुली पूर्ण करण्यात यश मिळविले होते.
संगमनेर तालुका महसूल विभागाने यामुळे आपलाच गतवर्षीचा उच्चांक मोडीत काढला असून नवा उच्चांक प्रस्थापित केला आहे. यामुळे अहमदनगर जिल्ह्यामध्ये संगमनेर तालुक्याचे कामगिरी सरस ठरली आहे. यामुळे जिल्ह्याच्या तसेच राज्याच्या तिजोरीत देखील मोठ्या प्रमाणात पैसा जमा करण्यात प्रशासनाला यश आले आहे.
जमीन महसूल वसुली अंतर्गत शेतसारा, बिनशेती सारा, अनधिकृत अकृषक कर, नजराणा प्रकरणे, मोबाईल टॉवर व इतर कर यामधून शासनाला ७ कोटी ७० लाख रुपये, गौणखनिज परवाने, विविध शासकीय विभाग रॉयल्टी रक्कम, अवैध गौण खनिज वाहतूक दंड इत्यादी माध्यमातून १४ कोटी ९३ लाख रुपये वसूल करण्यात आला असून या कराचा भरणा शासकीय तिजोरीत करण्यात आला आहे.
निवासी नायब तहसीलदार गणेश तळेकर, महसूल नायब तहसीलदार उमाकांत कडनोर, शिरस्तेदार श्रीकांत लोमटे, अव्वल कारकून महेश खरपुडे, महसूल सहाय्यक अंजना पवार यांच्यासह तालुक्यातील तलाठी कोतवाल कार्यालयीन कर्मचारी यांच्या प्रयत्नातून उद्दिष्ट साध्य करण्यात महसूल प्रशासनाला यश आल्याची माहिती तहसीलदार अमोल निकम यांनी दिली.
☆
संगमनेरचे प्रांताधिकारी डॉ. शशिकांत मंगरुळे यांनी वेळोवेळी केलेले मार्गदर्शन, वस्तुनिष्ठ नियोजन या बळावर यावर्षीचे महसूल वसुलीचे उद्दिष्ट पूर्ण करण्यात संगमनेर तालुक्याला यश मिळाले आहे.
अमोल निकम, तहसीलदार, संगमनेर
