मुंबई : महाराष्ट्र संवाद न्यूज
नगर विकास मंत्रालयातर्फे दिला जाणारा प्रतिष्ठेचा स्वराज्य अभियंता हिरोजी इंदुलकर गुणवंत अभियंता पुरस्कार अकोले तालुक्यातील सुपुत्र विजय कारभारी चौधरी यांना जाहीर झाला आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या हस्ते गुरुवारी (20 एप्रिल) मुंबईत नॅशनल सेंटर फॉर परफॉर्मिंग आर्ट्स येथे पुरस्काराचे वितरण होणार असल्याची माहिती शासनाचे अप्पर सचिव अजयसिंग पाटील यांनी दिली.
अहमदनगर जिल्ह्यातील आदिवासी दुर्गम अकोले तालुक्यातील आंभोळ या छोट्याशा दुष्काळी गावाचे रहिवासी असलेले विजय चौधरी नगर विकास मंत्रालयात उपसचिव म्हणून कार्यरत आहे. चौधरी यांनी नागरी जमीन कमाल धारणा कायदा निरसिद्ध झाल्यानंतर शासन देयक्षेत्रापोटी सन 2019 ते 2023 या कालावधीत योजना धारकांकडून सुमारे अकराशे कोटींचा महसूल राज्य शासनाला मिळवून देण्यामध्ये मोलाचे योगदान दिले आहे. संचालक नगर रचना व अधिनस्त कार्यालयांसाठी सुमारे 1199 पदांचा सुधारित आकृतीबंध त्यांनी निश्चित केला तसेच गुणवंत अधिकारी, कर्मचारी व कार्यालयांसाठी पुरस्काराची योजना तयार केली.
मुंबई येथील स्व. बाळासाहेब ठाकरे स्मारकासाठी प्रशासकीय व अर्थसंकल्पीय बाबी विहित मर्यादेत त्यांनी पूर्ण केल्या आहे. मुंबई मेट्रोलाईन 3 करिता सुधारित प्रशासकीय मान्यता तसेच आरे कार विषयीच्या प्रशासकीय व न्यायालयीन प्रकरणांच्या बाबीही त्यांनी विहित वेळेत पूर्ण केल्यामुळे त्यांची या पुरस्कारासाठी निवड करण्यात आली असल्याचे पाटील यांनी सांगितले.
