महाराष्ट्र संवाद न्यूज
अकोले तालुक्यातील आंभोळ गावचे सुपुत्र असलेल्या विजय चौधरी यांना राज्याच्या नगर विकास मंत्रालयातर्फे दिला जाणारा प्रतिष्ठेचा स्वराज्य अभियंता हिरोजी इंदुलकर गुणवंत अभियंता पुरस्कार मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या हस्ते गुरुवारी मुंबईत प्रदान करण्यात आला.
मुंबईत नरिमन पॉईंट येथील नॅशनल सेंटर फॉर परफॉर्मिंग आर्ट्स मध्ये मान्यवरांच्या उपस्थितीत या पुरस्काराचे वितरण करण्यात आले.
महाराष्ट्र शासनाच्या नगर विकास मंत्रालयात उपसचिव म्हणून कार्यरत असलेले विजय चौधरी यांनी नागरी जमीन कमाल धारणा कायदा निरसिद्ध झाल्यानंतर शासन देय क्षेत्रापोटी सन २०१९ ते २०२३ या कालावधीत योजना धारकांकडून सुमारे अकराशे कोटींचा महसूल राज्य शासनाला मिळवून देण्यामध्ये मोलाचे योगदान दिले.
संचालक नगर रचना व अधिनस्त कार्यालयांसाठी सुमारे ११९९ पदांचा सुधारित आकृतीबंध त्यांनी निश्चित केला तसेच गुणवंत अधिकारी व कर्मचारी व कार्यालयांसाठी पुरस्काराची योजनाही तयार केली. मुंबई येथील स्व. बाळासाहेब ठाकरे स्मारकासाठी प्रशासकीय व अर्थसंकल्पीय बाबी विहित मर्यादेत त्यांनी पूर्ण केल्या. मुंबई मेट्रो लाईन ३ करिता सुधारित प्रशासकीय मान्यता तसेच आरे कार विषयीच्या प्रशासकीय व माननीय न्यायालयीन प्रकरणांच्या बाबीही त्यांनी विहित वेळेत पूर्ण केल्यामुळे त्यांची या पुरस्कारासाठी निवड करण्यात आली.
चौधरी यांना यापूर्वी अकोले गौरव पुरस्कार, महाराष्ट्र राज्य मराठी पत्रकार संघ, मुंबई यांचा आदर्श अधिकारी पुरस्कार प्राप्त झालेला आहे. गावाच्या विकासासाठी ते नेहमी योगदान देत असतात. आदिवासी दुर्गम अकोले तालुक्यात पर्यटन विकास व्हावा यासाठीही ते प्रयत्नशील आहेत.
