शिर्डी, (महाराष्ट्र संवाद न्यूज)
‘‘लोणी जिल्हा परिषद शाळेची बीओटी तत्त्वावर सुंदर इमारत उभारण्यात आली आहे. लोणी जिल्हा परिषद शाळेचे हे बीओटी मॉडेल राज्यभर राबविण्यात येईल.’’ अशी घोषणा राज्याचे शालेय शिक्षण, मराठी भाषा विभाग मंत्री दीपक केसरकर यांनी केली.
लोणी बु. येथे बीओटी तत्त्वावर बांधण्यात आलेल्या जिल्हा परिषदेच्या शाळेच्या इमारतीचे व पंधराव्या वित्त आयोगाच्या निधीतून बांधण्यात आलेल्या व्यापारी संकुल इमारतीचे लोकार्पण शालेय शिक्षणमंत्री दीपक केसरकर यांच्या हस्ते झाले. कार्यक्रमाच्या अध्यक्षस्थानी राज्याचे महसूल, पशुसंवर्धन व दुग्ध व्यवसाय विकास तथा जिल्ह्याचे पालकमंत्री राधाकृष्ण विखे-पाटील होते. यावेळी खासदार डॉ. सुजय विखे-पाटील, प्रवरा अभिमत विद्यापीठाचे कुलपती डॉ. राजेंद्र विखे-पाटील, अहमदनगर जिल्हा सहकारी बँकेचे संचालक अण्णासाहेब म्हस्के-पाटील, ह.भ.प उद्धव महाराज मंडलिक, जिल्हा परिषदेच्या माजी अध्यक्ष शालिनीताई विखे-पाटील, जिल्हाधिकारी सिध्दाराम सालीमठ, मुख्य कार्यकारी अधिकारी आशिष येरेकर आदी उपस्थित होते.
मंत्री केसरकर म्हणाले, परदेशासारखे शिक्षण ग्रामीण भागातील मुलांना मिळाले पाहिजे, यासाठी स्वर्गीय पद्मश्री डॉ. विठ्ठलराव विखे-पाटील व स्वर्गीय पद्मभूषण डॉ. बाळासाहेब विखे-पाटील यांनी सहकाराबरोबर शिक्षण क्षेत्रात काम केले. तंत्रज्ञानातील शिक्षण ग्रामीण भागातील मुलांना मिळावे, यासाठी बाळासाहेब विखे पाटील यांनी राज्यातील पहिल्या खासगी आयटीआयची मुहूर्तमेढ लोणी येथे रोवली. यातून त्यांची शिक्षणविषयक दूरदृष्टी दिसून येते.
विद्यार्थ्यांना शेतीचे ज्ञान व कौशल्य प्राप्त व्हावे. यासाठी पुढील शैक्षणिक वर्षापासून कृषी हा विषय इयत्ता १ ली ते १२ वी पर्यंतच्या विद्यार्थ्यांना शिकविण्यात येणार आहे. शालेय शिक्षणाचा पाया मजबूत करण्याचे काम जिल्हा परिषद शाळा करत असतात. लोणी येथे ‘बांधा,वापरा व हस्तांतरित करा’ (बीओटी) या तत्वावर बांधण्यात आलेली जिल्हा परिषद शाळा राज्यासाठी आदर्शवत आहे.
मंत्री विखे म्हणाले, लोणी परिसरात अध्‍यात्मिक वारसा जोपासण्याचे काम पद्मश्री डॉ. विठ्ठलराव विखे पाटील आणि पद्मभूषण डॉ. बाळासाहेब विखे पाटील यांनी केले. ग्रामीण शिक्षण, सहकार, कृषी व आरोग्याचा पाया मजबूत करण्याचे काम त्यांनी केले. आण्‍णासाहेब म्हस्के पाटील, खासदार डॉ. सुजय विखे यांनीही मनोगत व्‍यक्‍त केले.
