संगमनेर (महाराष्ट्र संवाद न्यूज)
संगमनेरात आता बिबट्यांच्या अवयवाच्या तस्करीचा खळबळजनक प्रकार समोर आला आहे. बिबट्याच्या अवयवांची तस्करी करणाऱ्या दोघा तस्करांना पकडण्यात संगमनेरच्या वनविभागाला यश आले आहे. तर त्यांचा तिसरा साथीदार पळून जाण्यात यशस्वी ठरला. संगमनेरचे वनपरिक्षेत्र अधिकारी सचिन एच. लोंढे यांनी प्रसिद्धी पत्रकाद्वारे ही माहिती दिली.
शनिवारी (ता. १९ मे) नासिक-पुणे महामार्गावरील हिवरगाव पावसा टोल नाक्याजवळ दुचाकीवरून येणारे काही लोक बिबट्याच्या दात सुळे नखे आणि मिशांची विक्री करणार असल्याची माहिती वनविभागाच्या अधिकाऱ्यांना समजली होती. या माहितीच्या आधारे वनक्षेत्र अधिकारी सचिन लोंढे यांनी या परिसरात आरोपींना पकडण्यासाठी सापळा रचला. संशयित व्यक्ती या ठिकाणी आल्यानंतर वनविभागाच्या अधिकाऱ्यांनी बनावट ग्राहक बनून संशयतांसोबत बोलणी केली. त्यांच्याकडे बिबट्याचे अवयव असल्याचे खात्री होताच वनविभागाच्या अधिकाऱ्यांनी त्यांना पकडले.
कारवाई दरम्यान दोघेजण वनविभागाच्या अधिकाऱ्यांच्या हाती लागले. श्रीराम यादव सरोदे वय ३४ वर्षे व सुधीर विजय भालेराव वय ३० वर्ष ( दोघे रा. आनंदवाडी, चंदनापुरी ता. संगमनेर) अशी पकडलेल्या दोघांची नावे असून सुशांत उत्तम भालेराव (रा. आनंदवाडी, चंदनापुरी ता. संगमनेर) असे पसार झालेल्या आरोपीचे नाव आहे. पकडलेल्या दोघा आरोपींकडून वन विभागाच्या अधिकाऱ्यांनी बिबट्याची नखे, दात आणि इतर अवयव जप्त केले आहेत.
मोठ्या प्रमाणात बिबट्यांचा वावर असलेल्या संगमनेर अकोले तालुक्यात वनविभागाची कार्यशैली नेहमीच वादाच्या भोवऱ्यात राहिली आहे. मात्र वनविभागाच्या या कारवाईमुळे संगमनेरात वनखाते अस्तित्वात असल्याची चुणूक या कारवाईतून मिळाली आहे.
उपविभागीय वनाधिकारी संदीप पाटील, जुन्नरचे उप वनसंरक्षक अमोल सातपुते, योगेश वरखड यांच्या मार्गदर्शनाखाली रईस मोमीन, संदीप येवले, कुणाल घुले, तन्मय बागल, हरून सय्यद, विक्रांत बुरांडे, अरुण देशमुख, गजानन पवार, वनपाल चैतन्य कासार, एस. एम. पारधी, जी. बी. पवार यांनी ही कारवाई केली. फरार झालेल्या तिसऱ्या आरोपीचा वनविभागाकडून शोध सुरू आहे.
आरोपीं विरोधात गुन्हा दाखल करण्यात आला असून दोघांना अटक करण्यात आली आहे. योगेश वरखड मुंबई, उपविभागीय वनाधिकारी संदीप पाटील, जुन्नरचे उप वनसंरक्षक अमोल सातपुते यांच्या मार्गदर्शनाखाली वनविभागाचे अधिकारी पुढील तपास करीत आहेत.
