संगमनेर (महाराष्ट्र संवाद न्यूज)
रात्रीच्या वेळी मोबाईल टॉवरवर आराम करण्यासाठी बसलेल्या विविध प्रकारच्या पक्षांना पकडण्यासाठी मध्यरात्री दीड वाजण्याच्या सुमारास तो मोबाईल टॉवरवर चढला. मध्यरात्रीच्यावेळी टॉवरवर चढलेल्या या युवकाला टॉवरच्या उंचीचा अंदाज आला नाही. पक्षी पकडण्याच्या नादात टॉवरवरून तोल जाऊन खाली पडताना तो जीव गमावून बसला.
संगमनेर तालुक्यातील अंभोरे या गावी रविवारी मध्यरात्री दीड वाजण्याच्या सुमारास हा प्रकार घडला. गणेश भास्कर गवळी (वय अंदाजे 27 वर्ष) असे या मृत झालेल्या दुर्दैवी तरुणाचे नाव आहे. गवळी हा लहानपणापासून आणि लग्नानंतरदेखील पत्नी आणि दोन मुलींसह आपला मेव्हणा काळू बर्डे यांच्याकडे राहावयास होता. रविवारी गावात कार्यक्रम असल्याने गणेश गवळी याने मद्य प्राशन केल्याची माहिती समजते.
रात्री गावातील मोबाईल टॉवरवर अनेक पक्षी बसलेले बघून त्यांना पकडण्याचा मोह गवळी याला झाला. त्यामुळे रात्री तो पक्षांना पकडता येईल या उद्देशाने मोबाईल टॉवरवर चढला होता. पक्षी पकडण्याच्या नादात गवळी तोल जाऊन खाली पडला. खाली पडत असताना टॉवरच्या मध्यभागी एका लोखंडी अँगलला तो लटकला गेला.
सकाळी टॉवरवर गवळी लोखंडी अँगलला लटकलेला असल्याचे शेजारील काही लोकांच्या लक्षात आल्याने त्यांनी याची माहिती गावचे पोलीस पाटील विनोद साळवे यांना दिली. साळवे यांनी घटनास्थळी जात मोबाईल टॉवरवर गवळी मृत अवस्थेत लटकलेला असल्याची खातरजमा केल्यानंतर याची माहिती संगमनेर तालुका पोलीस ठाण्याला कळविली.
गवळी याचा मृतदेह उत्तरीय तपासणीसाठी संगमनेरच्या कॉटेज रुग्णालयात आणण्यात आला. दरम्यान या संदर्भात अधिक माहिती घेण्यासाठी संगमनेर तालुका पोलिसांची संपर्क केला असता त्यांच्याकडून प्रतिसाद मिळू शकला नाही.
