महाराष्ट्र संवाद न्यूज
संगमनेर – भगवा मोर्चाच्या दिवशी संपूर्ण जिल्हा पोलीस यंत्रणा अलर्ट मोडवर असताना संगमनेर शहरातील पुणे नाक्याजवळ स्थानिक गुन्हे शाखेच्या पथकाने दुपारी हातामध्ये धारदार तलवार घेऊन भर चौकात फिरणाऱ्या एकाला पकडले.
लक्षवेधी ठरलेला भगवा मोर्चा शांततेत आणि नियोजित वेळेत पार पडल्यानंतर बराच गदारोळ झाला. पोलीस ठाण्यात दगडफेक, हाणामारीचे गुन्हे दाखल झाले. कायदा सुव्यवस्थेचा प्रश्न निर्माण झाल्याने या पार्श्वभूमीवर शहरात वातावरण तणावाचे होते. वेगवेगळ्या वावड्या उठत होत्या. अशाही परिस्थितीत पोलीस अधीक्षक राकेश ओला, अप्पर अधीक्षक स्वाती भोर, पोलीस उपाधीक्षक सोमनाथ वाघचौरे, पोलीस निरीक्षक भगवान मथुरे यांच्या नेतृत्वाखाली पोलिसांनी परिस्थितीवर नियंत्रण ठेवले होते. अपवादात्मक घटना तातडीने नियंत्रणात आणल्याने पुढील अनर्थ टळला.
मोर्चानंतर उद्भवलेल्या परिस्थितीमुळे पोलिसांची धावपळ सुरूच असताना नगरच्या स्थानिक गुन्हे शाखेचे पोलीस निरीक्षक दिनेश आहेर यांच्या नेतृत्वाखालील पथक संगमनेर शहरात गस्त घालत होते. या पथकाला वेगळीच चाहूल लागली आणि हातात धारदार तलवार घेऊन फिरणाऱ्याला पोलिसांनी ताब्यात घेतले. अनेक गुन्ह्याची माहिती दडविणाऱ्या पोलीस ठाण्यातून हा प्रकार समोर आला आहे.
मोर्चा झाल्यानंतर घडलेल्या काही घटनांमुळे काही बाबी हळूहळू उघडकीस येऊ लागल्या आहेत. मोर्चा संदर्भात कुठलीही माहिती द्यायची नाही असा कायदा पोलिसांनी स्वतःच्या मर्जीने करून टाकला. विशेष म्हणजे दाखल झालेले गुन्हे आणि अटक केलेल्या आरोपींची देखील माहिती द्यायची नाही असा पोलिसांचा पवित्रा आहे. हा प्रकार म्हणजे आरोपींना पाठीशी घालण्यासारखेच असल्याचे बोलले जात आहे. पोलिसांचा गुन्हा आणि आरोपींची नावे लपवण्यामागे कुठला हेतू आहे ? नोंदणी झालेले गुन्हे आणि गुन्ह्याची माहिती माध्यमांना देणे आवश्यक आहे. यातून समाजात पोलिसांच्या कामाबद्दल चांगला संदेश जाऊ शकतो आणि कायदा सुव्यवस्था राखण्यासाठी त्याची मदत होऊ शकते याचा विसर पडलेले स्थानिक पोलीस मात्र गुन्ह्यांची माहिती देण्यासंदर्भात लपवाछपवी करत आहेत. तरी देखील माहितीला पाय फुटतात आणि त्याची बातमी बनते.
असाच हा तलवारीचा प्रकार समोर आला आहे. पोलीस ठाण्यातील दाखल झालेल्या या घटनेचा एफआयआर ‘महाराष्ट्र संवाद न्यूज’च्या हाती लागला.
भगवा मोर्चाच्या दिवशी मंगळवारी (ता. ६ जून) नगरच्या स्थानिक गुन्हे शाखेच्या पोलीस कॉन्स्टेबल विजय सिद्धार्थ धनेधर यांच्या तक्रारीवरून शहर पोलीस ठाण्यात या संदर्भातील गुन्हा नोंदविला गेला. भगवा मोर्चाच्या दिवशी दुपारी संगमनेर शहरातील जोर्वे नाक्याच्या पुढे जुना पुना नाका परिसरात एक इसम हातामध्ये धारदार तलवार घेऊन आजूबाजूला फिरत असल्याचे नगरच्या स्थानिक गुन्हे शाखेला समजले. त्यानुसार त्यांनी सदर ठिकाणी जाऊन माहिती घेतली असता शहरातील नाईकवाडपुरा येथील रहिवासी रौफ इस्माईल शेख नावाचा इसम हातामध्ये तलवार घेऊन फिरत असल्याचे आढळून आले. पोलिसांनी त्याच्याकडे चौकशी केली असता त्याने उडवा उडवीची उत्तरे दिली त्यामुळे पोलिसांनी त्याला ताब्यात घेतले व गुन्हा दाखल केला. पोलिसांनी संबंधित इसमाकडून दोन फूट लांब आणि मोठी पितळी मूठ असलेली टोकदार, धारदार तलवार जप्त केली आहे. 
