महाराष्ट्र संवाद न्यूज
संगमनेरातील बेकायदा कत्तलखाने राजरोसपणे सुरूच आहेत. याच कत्तलखान्यातून मुंबईच्या दिशेने जाणारे सहाशे किलो गोमांस वावी (नाशिक) पोलिसांनी नासिक-पुणे महामार्गावर गोंदे फाटा शिवारात पकडले. समृद्धी मार्गाने हे गोमांस जाण्यापूर्वीच पोलिसांनी पकडत दोघांना ताब्यात घेतले.
संगमनेरमधून मुंबईच्या दिशेने एका आलिशान कारमधून गोमांस वाहतूक होत असल्याची माहिती वावी पोलीस स्टेशनचे सहाय्यक पोलीस निरीक्षक चेतन लोखंडे यांना मिळाली होती. नाशिक-पुणे महामार्गावरून सिन्नर जवळील गोंदे फाटा येथील टोल नाक्यावरून समृद्धी महामार्गाने ही कार जाणार होती.
मात्र तत्पूर्वीच समृद्धी महामार्गावर चढणाऱ्या रस्त्यावर सहाय्यक पोलीस निरीक्षक चेतन लोखंडे यांच्या मार्गदर्शनाखाली नितीन जगताप, प्रवीण आढांगळे, भास्कर जाधव, एन. सी. मैंद, रत्नाकर तांबे, शैलेश शेलार आदींनी केलेल्या नाकाबंदीत गोमांस वाहतूक करणारी मारुती सुझुकी कार क्र. एम. एच. ०४ इडी ७९५९ ही अलगद अडकली.
पथकाने कारची तपासणी केली असता कारच्या पाठीमागील सीटवर आणि डिक्कीमध्ये काळ्या रंगाच्या प्लास्टिक खाली सुमारे ६०० किलो गोमांस आढळून आले पोलिसांनी कारवाईत तीन लाख आठ हजार रुपयांचा मुद्देमाल हस्तगत केला असून अझरुद्दीन जमालुद्दीन शेख (वय २७) व अहसान मोहम्मद कुरेशी (वय २२) या दोघांना ताब्यात घेतले. त्यांच्या विरोधात वावी पोलीस ठाण्यात गुन्हा दाखल करण्यात आला आहे. पोलीस पुढील तपास करीत आहेत.
