महाराष्ट्र संवाद न्यूज
संगमनेर – गुन्हेगारीचे माहेरघर झालेल्या संगमनेरमध्ये दागिने चोरीचा सिलसिला सुरूच आहे. दुचाकीवरून आलेल्या दोघांनी रात्री जेवणानंतर फिरण्यासाठी घराबाहेर पडलेल्या महिलेच्या गळ्यातील मंगळसूत्र ओढत धूम स्टाईलने पोबारा केला. या प्रकारामुळे दागिने चोरीच्या घटनेत आणखी एका गुन्ह्याची वाढ झाली.
बस स्थानकापासून जवळच असलेल्या पावबाकी रस्त्यावर रविवारी रात्री आठ वाजण्याच्या सुमारास हा प्रकार घडला. या संदर्भात जानकीनगरमध्ये दूधगंगा पतसंस्थेजवळ राहणाऱ्या सविता शशिकांत मुळे वय 65 वर्ष यांनी दिलेल्या फिर्यादीवरून अज्ञात दोघा चोरट्यांविरोधात गुन्हा दाखल करण्यात आला आहे.
औषध विक्रेते असलेले शशिकांत मुळे हे रविवारी रात्री आठ वाजण्याच्या सुमारास जेवणानंतर पत्नी सविता यांच्यासोबत फिरण्यासाठी घराबाहेर पडले होते. पावबाकी रस्त्याने फिरत असताना काही अंतर गेल्यावर जाणता राजा मैदानाकडून पावबाकी रस्त्याला मिळणाऱ्या रस्त्यावरून एका दुचाकीवर दोघेजण भरधाव वेगात त्यांच्याजवळ आले. काही समजण्यापूर्वीच दुचाकी चालकाने दोघांच्यामध्ये दुचाकी घातली. याच दरम्यान दुचाकीवर मागे बसलेल्या व्यक्तीने सविता मुळे यांच्या गळ्यातील सोन्याची पोत ओढत भरधाव वेगाने नाटकी रस्त्याच्या दिशेने निघून गेले.
गळ्यातील पोत ओढल्याचे लक्षात येताच या दांपत्याने आरडाओरडा केला. त्यामुळे तेथे गर्दी जमली मात्र घटनास्थळी पुरेसा प्रकाश नसल्याने दुचाकीवरील नंबर दिसून आला नाही. त्यानंतर त्यांनी पोलीस ठाण्यात येत याची माहिती दिली. सविता मुळे यांच्या तक्रारीवरून शहर पोलिसांनी सोन्याचे मनी मंगळसूत्र असलेले दोन तोळे वजनाचे सुमारे ४० हजार रुपये किमतीची पोत अज्ञात चोरट्यानी चोरून नेल्याबाबत भारतीय दंड संहिता कलम 392 नुसार गुन्हा दाखल केला आहे. पुढील तपास पोलिस निरीक्षक भगवान मथुरे यांच्या मार्गदर्शनाखाली सहायक पोलिस निरीक्षक पवार करत आहे.
