महाराष्ट्र संवाद न्यूज
नाशिकच्या दोन शिक्षणाधिकाऱ्यांचे लाचेचे प्रकरण ताजे असतानाच राज्याचा शिक्षण विभाग दिवसेंदिवस लाचखोरीने ग्रासल्याची अनेक उदाहरणे समोर येत आहे. आता तर चक्क चेकनेच 75 हजार रुपयांची लाच घेतल्याचा धक्कादायक प्रकार एसीबीच्या कारवाईत समोर आला आहे. तिघा लाचखोरांवर एरंडोल पोलीस ठाण्यात गुन्हा दाखल करण्याची प्रक्रिया सुरू आहे.
लाचखोरीचे विविध प्रकार समोर येत असतानाच आता चेकद्वारे लाच खाणारे तिघेजण एसीबीच्या जाळ्यात अडकले आहे. यात शिक्षण संस्थेच्या अध्यक्षासह मुख्याध्यापक आणि लिपिकाचा समावेश आहे.
यासंदर्भात अँटी करप्शन ब्युरोने दिलेल्या माहितीनुसार विनोद शंकर जाधव (वय 42 वर्ष, मुख्याध्यापक, महात्मा फुले हायस्कूल, एरंडोल) नरेंद्र उत्तम वाघ (वय 44 वर्ष, कनिष्ठ लिपिक, महात्मा फुले हायस्कूल, एरंडोल) व विजय पंढरीनाथ महाजन (वय 56 वर्ष, अध्यक्ष श्री. सावता माळी शिक्षण प्रसारक मंडळ जळगाव संचलित महात्मा फुले हायस्कूल, एरंडोल) अशी तिघा लाचखोरांची नावे आहेत.
नासिक विभागाच्या पोलीस अधीक्षक श्रीमती शर्मिष्ठा घारगे-वालावलकर यांच्या मार्गदर्शनाखाली व सापळा पर्यवेक्षण अधिकारी जळगावचे पोलीस उपाधीक्षक शशिकांत पाटील, सापळा व तपास अधिकारी पोलीस निरीक्षक एन. एन. जाधव यांच्या नेतृत्वाखाली पोलीस हेडकॉन्स्टेबल सुनील पाटील, रवींद्र घुगे, पोलीस नाईक ईश्वर धनगर, पोलीस कॉन्स्टेबल सचिन चाटे यांच्या पथकाने ही कारवाई केली.
याशिवाय कारवाई मदत पथकामध्ये पोलीस निरीक्षक एस. के. बच्छाव, सहाय्यक फौजदार सुरेश पाटील, महिला पोलीस हेड कॉन्स्टेबल शैला धनगर, पोलीस नाईक किशोर महाजन, सुनील वानखेडे, बाळू मराठे, पोलीस कॉन्स्टेबल प्रदीप राकेश दुसाने, अमोल सूर्यवंशी, प्रणेश ठाकूर यांचा समावेश होता.
अधिक माहिती अशी, महात्मा फुले हायस्कूल, एरंडोल येथे उपशिक्षक पदावर कार्यरत असलेल्या दोघांची बदली 1 एप्रिल 2023 रोजी एरंडोल हायस्कूल येथून महात्मा फुले हायस्कूल धरणगाव येथे करण्यात आली होती. या बदलीच्या मंजुरीसाठीचा प्रस्ताव 2 मे 2023 रोजी शिक्षण अधिकारी माध्यमिक शिक्षण विभाग जिल्हा परिषद जळगाव यांच्याकडे पाठविण्यात आला.
या बदलीस स्थगिती मिळावी व पाठवलेला मंजुरी प्रस्ताव रद्द करण्यात यावा. अशा आशयाचे संस्थेचे पत्र शिक्षण अधिकारी, जळगाव यांना देणे आवश्यक होते. या कामासाठी लाचखोर मुख्याध्यापक आणि लिपिकाने दोन्ही उपशिक्षकांकडे लाचेची मागणी केली. या दोघांनी स्वतःसाठी आणि संस्थेच्या लाचखोर अध्यक्षासाठी पूर्ण एक महिन्याचा पगार म्हणजेच 75 हजार रुपये चेकच्या रूपाने देण्यास या दोघा शिक्षकांना सांगितले होते.
त्यानंतर याप्रकरणी एसीबीकडे तक्रार करण्यात आली एसीबीने तक्रारीची पडताळणी करत सापळा रचला. अध्यक्षाने लिपिकाच्या फोनवरून फोन करत मुख्याध्यापकाच्या नावाने पूर्तता करण्यास सांगितले होते. 75 हजार रुपयांचा मुख्याध्यापकाच्या नावाने असलेला चेक लाचखोर मुख्याध्यापक जाधव याने स्वीकारला. चेक स्वीकारताच त्याला पथकाने रंगेहाथ पकडले असून मुख्याध्यापक, लिपिक आणि संस्थेच्या अध्यक्षावर पोलीस ठाण्यात गुन्हा दाखल करण्याचे काम सुरू होते.
