महाराष्ट्र संवाद न्यूज
अहमदनगर – तक्रारदाराच्या कुटुंबीयांवर दाखल असलेल्या गुन्ह्यामध्ये जामीन प्रक्रियेत मदत केली म्हणून व गुन्ह्याच्या तपासात मदत करण्यासाठी दहा हजार रुपयांची लाच मागणारा लाचखोर पोलीस हवालदार चार हजार रुपये स्वीकारताना एसीबीच्या जाळ्यात अडकला.
ज्ञानेश्वर रावसाहेब पठारे (नेमणूक बेलवंडी पोलीस स्टेशन, श्रीगोंदा, जि. अहमदनगर) असे या लाचखोर पोलीस हवालदाराचे नाव आहे. अहमदनगर एसीबीचे पोलीस उपाधीक्षक प्रवीणचंद्र लोखंडे यांच्या मार्गदर्शनाखाली सापळा अधिकारी पोलीस निरीक्षक गहिनीनाथ गमे यांच्या नेतृत्वाखालील पथकाने ही कारवाई केली.
तक्रारदाराने एसीबीकडे केलेल्या तक्रारीनुसार, तक्रारदार त्याची पत्नी, मुलगी व मुलगा यांच्यावर बेलवंडी पोलीस ठाण्यात 1 जून 2023 रोजी गुन्हा दाखल असून या गुन्ह्यामध्ये 12 जून रोजी लाचखोर आरोपी पोलीस हवालदार ज्ञानेश्वर पठारे याने जामीन प्रक्रियेत मदत केली म्हणून व गुन्ह्याच्या तपासात मदत करण्यासाठी तक्रारदाराकडे दहा हजार रुपयांची लाच मागितली होती.
अशी तक्रार नगर एसीबीकडे मिळाल्यानंतर नगर एसीबीने याबाबत पडताळणी केली असता आरोपी पोलीस हवालदार पठारे यांनी दहा हजार रुपयांची मागणी केल्याचे स्पष्ट झाले. तडजोडीअंती चार हजार रुपये स्वीकारण्याचे मान्य केल्यानंतर एसीबीने त्याला पकडण्यासाठी सापळा लावला होता.
बेलवंडी पोलीस ठाण्यात तक्रारदाराकडून चार हजार रुपयांची लाच घेताना बुधवारी पोलीस हवालदार पठारे एसीबीच्या जाळ्यात अडकला. आरोपी ज्ञानेश्वर पठारे यांच्या विरोधात गुन्हा दाखल करण्यात आला आहे.
