महाराष्ट्र संवाद न्यूज
पुणे – कोपरगावच्या दर्शना पवार हत्या प्रकरणाचा उलगडा करण्यात पुणे पोलीस यशस्वी झाले आहे. संशयित आरोपी आणि दर्शनाचा मित्र राहुल हंडोरे याला पोलिसांनी मुंबईतून अटक केली आहे. लग्नाला नकार दिल्याच्या कारणातून ही हत्या झाल्याचे समोर येत आहे.
राजगड किल्ल्याच्या पायथ्याशी एमपीएससी परीक्षेत यश मिळवत रेंज फॉरेस्ट ऑफिसर (RFO) झालेल्या दर्शनाचा मृतदेह काटवणामध्ये आढळून आला होता. शवविच्छेदन अहवालानंतर तिचा खून झाल्याचे निष्पन्न झाले होते. पोलीस तपासात ती मित्र राहुल हंडोरे यांच्यासोबत राजगडावर गेली होती. मात्र काही वेळानंतर राहुल हंडोरे हा एकटाच गडावरून खाली आल्याचे निष्पन्न झाले होते. घटनेनंतर तो गायब झाल्याने या हत्याप्रकरणी पोलिसांची संशयाची सुई राहुलच्या दिशेने होती. पोलिसांची पाच पथके त्याच्या मागावर होती. अखेरीस मुंबईहून पुण्याच्या दिशेने येत असताना त्याला पकडण्यात पोलिसांना यश आले.
नासिक जिल्ह्यातील सिन्नर तालुक्यातील राहुल हंडोरे हा देखील दर्शनासोबत स्पर्धा परीक्षेचा अभ्यास करत होता. दर्शना आणि त्याची लहानपणापासूनची ओळख होती. दर्शना सोबत विवाह करण्याची त्याची इच्छा होती. मात्र एमपीएससी उत्तीर्ण झाल्यानंतर दर्शनाच्या घरच्यांनी तिचा विवाह दुसऱ्या एका मुलासोबत ठरविला होता. त्यानंतर राहुल हंडोरे याने तिच्या घरच्यांना मला वेळ द्या, मी देखील स्पर्धा परीक्षा यशस्वी करतो, असे सांगितले होते. मात्र घरच्यांनी त्याला नकार दिला होता.
दर्शना एका अकॅडमीच्या वतीने आयोजित सत्कारासाठी पुण्यात आली असताना राहुल सोबत राजगडावर गेली होती. त्यानंतर हा प्रकार घडला. दर्शनाची हत्या केल्यानंतर राहुल बंगालला गेला होता. त्यानंतर तो मुंबईत आला. मुंबईत येताच बुधवारी रात्री पोलिसांनी राहुल याला ताब्यात घेतले असून गुरुवारी त्याला न्यायालयासमोर नेले जाणार असल्याचे पोलिसांनी पत्रकार परिषदेत सांगितले.
(छायाचित्र सौजन्य दैनिक सकाळ)
