महाराष्ट्र संवाद न्यूज
विविध गुन्ह्यांच्या तपासाकामी जप्त करण्यात आलेल्या आणि पोलिसांच्या रखवालीत असलेल्या दुचाकींची आता चोरी होऊ लागले आहे. हा धक्कादायक प्रकार संगमनेर शहर पोलीस ठाण्यातून समोर आला आहे. याप्रकरणी अज्ञात चोरट्याविरुद्ध महिला पोलीस हेड कॉन्स्टेबलने दिलेल्या तक्रारीवरून गुन्हा दाखल करण्यात आला आहे.
संगमनेर शहर पोलीस ठाण्यात महिला पोलीस कर्मचारी अनिता गुंजाळ यांनी दिलेल्या तक्रारीत म्हटले आहे की, पोलीस ठाण्यामध्ये गुन्ह्याच्या तपासाकामे जप्त करण्यात आलेली वाहने ही पोलीस स्टेशन, तहसील कार्यालयाच्या आवारात लावली जातात. ज्या ठिकाणी वाहने लावण्यासाठी जागा अपुरे असल्याने ही वाहने शहरातील जुन्या पोलीस वसाहतीच्या आवारामध्ये लावली जातात. तसेच काही दुचाकी वाहने ना दुरुस्त असलेल्या खोलीच्या वाड्यामध्ये लावण्यात आलेली आहे.
गुरुवारी दुपारी गुंजाळ यांनी नेहमीप्रमाणे वाहनांची तपासणी केली असताना पोलीस वसाहतीतील पडक्या रूम मध्ये लावलेली काळ्या रंगाची रॉयल एनफिल्ड कंपनीची बुलेट (MH20 A 9423) व बजाज कंपनीची पल्सर मोटरसायकल (MH17 CA 9860) आढळून आली नाही.
त्यामुळे गुंजाळ यांनी आजूबाजूच्या परिसरात दोन्ही दुचाकींचा शोध घेतला असता दुचाकी आढळून न आल्याने त्यांनी हा प्रकार पोलीस निरीक्षक भगवान मथुरे यांना सांगितला. त्यानंतर शहर पोलीस ठाण्यात अज्ञात इसमाविरुद्ध चोरीच्या गुन्ह्याची नोंद करण्यात आले असून पोलीस पुढील तपास करत आहे.
