महाराष्ट्र संवाद न्यूज
अनधिकृत वीज चोरून वापरल्या प्रकरणी दिलेल्या वीज बिलाचा भरणा न करणाऱ्या पठार भागातील दोघांविरोधात घारगाव पोलीस ठाण्यात भारतीय विद्युत कायदा 2003 चे कलम 135 प्रमाणे गुन्हा दाखल करण्यात आला आहे.
महाराष्ट्र राज्य वीज वितरण कंपनीचे सहाय्यक अभियंता समाधान घुगे यांनी दिलेल्या फिर्यादीवरून मांडवे बुद्रुक येथील शशिकांत धोंडीबा कुटे आणि बिरेवाडी येथील बाळासाहेब पांडुरंग क्षीरसागर यांच्या विरोधात हा गुन्हा दाखल करण्यात आला आहे.
या संदर्भात घुगे यांनी दिलेल्या तक्रार म्हटले आहे की, 8 मे 2023 रोजी सकाळी नऊ वाजण्याच्या सुमारास ते आणि बाह्यश्रोत कर्मचारी के. के. गाडेकर वरिष्ठ तंत्रज्ञ डी. एस. शेळके यांच्या समवेत कायमस्वरूपी विद्युत पुरवठा खंडित केलेल्या ग्राहकांची तपासणी करत असताना मांडवे बुद्रुक येथे शशिकांत धोंडीबा कुटे हे त्यांच्या सलून दुकानांमध्ये सलून समोरील लघुदाब वाहिनीवरून अडीच स्क्वेअर एमएमच्या काळ्या रंगाच्या सिंगल फेज वायरने आकडा टाकून अनधिकृत वीज चोरी करताना आढळून आले होते.
त्यामुळे त्यांचा विज वापर लक्षात घेता त्यांना 11960 रुपयांचे दंडाचे विज बिल देण्यात आले. मात्र वारंवार मागणी करून देखील त्यांनी वीज बिलाचा भरणा केलेला नाही.
तसेच 9 मे 2023 रोजी अशाच प्रकारे बिरेवाडी येथील बाळासाहेब पांडुरंग क्षीरसागर यांच्या घरी आकडा टाकून वीज वापर होत असल्याचे निदर्शनास आले होते त्यांना देखील 7700 रुपयांचे दंडासह वीज बिल देण्यात आले परंतु त्यांनी देखील अद्याप पर्यंत वीज बिलाचा भरणा केला नसल्याने या दोघांच्याही विरोधात घारगाव पोलीस ठाण्यात गुन्हा दाखल करण्यात आला असून पुढील तपास पोलीस करत आहेत.
