महाराष्ट्र संवाद न्यूज
उत्तर प्रदेशातील सहानपूर येथे भीम आर्मीचे अध्यक्ष चंद्रशेखर आजाद यांच्यावर अज्ञात लोकांनी गोळीबार केल्याची घटना घडली. या जीवघेण्या हल्ल्यातून ते बचावले असून जखमी अवस्थेत त्यांना उपचारासाठी स्थानिक सरकारी रुग्णालयात दाखल केल्याची माहिती मिळते.
आझाद त्यांच्या फॉर्च्यूनर कारमधून देवबंद दौऱ्यावर होते. ते देवबंदजवळ पोहोचले असताना काही अद्याप लोकांनी त्यांच्या कारवर अचानकपणे गोळीबार केला. त्यांच्या कारवार अनेक गोळ्यांचे ठसे दिसत असून कारच्या सगळ्या काचा फुटल्या आहेत. तसेच अज्ञातांनी झाडलेल्या गोळ्यांमधील एक गोळी आझाद यांच्या बरगडीला चाटून गेली आहे.
त्यामुळे त्यांना जखमी अवस्थेत उपचारासाठी रुग्णालयात दाखल करण्यात आले घटनास्थळी पोलीस दाखल झाले. त्यांनी याप्रकरणी तपास सुरू केला आहे. हल्लेखोर नेमके कोण होते हे अद्याप समजू शकलेले नसून ते गोळ्या झाडून पसार झाले आहेत. त्यामुळे हल्ल्याचे कारण अद्याप समोर आलेले नाही. हल्लेखोर पळून जाऊ नये, यासाठी पोलिसांनी विविध ठिकाणी नाकाबंदी केली असून हल्लेखोरांच्या शोधासाठी आजूबाजूच्या परिसरातील सीसीटीव्ही फुटेज तपासले जात आहे.
दरम्यान याप्रकरणी आझाद यांचे स्टेटमेंट समोर आले असून ते म्हणाले की, गोळीबार झाला तेव्हा माझ्यासोबत काहीजण होते. गोळीबारानंतर स्थानिक पोलिसांकडे मदतीसाठी संपर्क साधला. हल्लेखोरांबाबत मला व्यवस्थित आठवत नसले तरी माझ्यासोबत असणारे कार्यकर्ते त्यांना ओळखू शकतील. हल्ल्यानंतर हल्लेखोर कारने सहारनपुरच्या दिशेने निघून गेले. हल्ला झाला तेव्हा आम्ही पाच जण कारमध्ये होतो. यात आमच्या सहकारी डॉक्टरांना देखील गोळी लागली आहे.
