महाराष्ट्र संवाद न्यूज
बुलढाणा – महत्त्वकांक्षी आणि ड्रीम प्रोजेक्ट ठरलेल्या समृद्धी महामार्गावर पुन्हा एकदा भीषण अपघात झाला आहे. बुलढाण्यात समृद्धी महामार्गावर खासगी प्रवासी बसला भीषण अपघात झाला. रस्ता दुभाजकाला धडकून पलटी झालेल्या बसणे अचानक पेट घेतला. यात २५ प्रवाशांचा जागीच होरपळून मृत्यू झाला असल्याचे समोर आले आहे.
बुलढाणा जिल्ह्यातील सिंदखेडराजाजवळ पिंपळखुटा गावालगत समृध्दी महामार्गावर हा अपघात झाला. या बसमध्ये एकूण ३३ प्रवासी होते. चालक, वाहकासह ८ प्रवासी खिडक्या तोडून सुखरूप बाहेर पडले. उर्वरित २५ प्रवाशांचा मात्र होरपळून मृत्यू झाला असल्याची माहिती समोर येत आहे.
ही प्रवासी बस नागपूरहून पुण्याला निघाली होती. त्यावेळी रात्री दीड वाजण्याच्या सुमारास ही भीषण घटना घडली. विदर्भ ट्रॅव्हल्सच्या या अपघातग्रस्त बसमध्ये नागपूर, वर्धा आणि यवतमाळचे प्रवासी होते.
मिळालेल्या माहितीनुसार, मध्यरात्री ही बस सिंदखेडराजाजवळ पिंपळखुटा गावालगत समृध्दी महामार्गावर रस्ता दुभाजकावरी लोखंडी पोलला धडकली. यानंतर बस पलटी झाली. बसचा दरवाजा पलटी झालेल्या गाडीखाली आल्याने कोणालाही बाहेर पडता येत नव्हते. आणि त्यानंतर डिझेलच्या संपर्कात आल्याने बसने वेगाने पेट घेतला.
या दरम्यान चालक, वाहकासह काही प्रवासी गाडीच्या काचा फोडून बाहेर आले. दरम्यान, जखमींना जवळच्या शासकीय रुग्णालयात उपचारासाठी दाखल केले आहे. जे लोक बचावले आहेत, त्यांनी दिलेल्या माहितीप्रमाणे जे लोक काचेची खिडकी हाताने फोडून बाहेर निघू शकले त्यांचा जीव वाचला आहे.
अपघात स्थळी पोहोचलेल्या पोलिसांनी बसमधून २५ मृतदेह बाहेर काढले आहेत. जे मृतदेह बसमधून बाहेर काढण्यात आले आहेत, त्यांची ओळख पटवणे अडचणीचे होत आहे.
अपघात प्रकरणी विरोधी पक्षनेते अजित पवार यांनी समृद्धी महामार्गावरील मानवी त्रुटींमुळे अपघात घडत असल्याचा आरोप केला आहे. त्यांनी म्हटले आहे की, समृद्धी महामार्गावर सुरुवातीपासूनच अपघाताची मालिका सुरू आहे. या अपघातात अनेक नागरिकांना आपले प्राण गमवावे लागले आहेत. समृद्धी महामार्गाच्या सदोष निर्मितीमुळे आणि मानवी त्रुटींमुळे हे अपघात झाल्याचे वारंवार समोर आले आहे. यावर तातडीने उपाययोजना करण्याची मागणी वारंवार विरोधकांनी केली. सरकारने आता तरी या मागणीचा विचार करावा.
दरम्यान थोड्याच वेळात मुख्यमंत्री एकनाथ शिंदे, उपमुख्यमंत्री देवेंद्र फडणवीस अपघात स्थळी भेट देऊन पाहणी करणार आहेत.
