महाराष्ट्र संवाद न्यूज
अहमदनगर – न्यायालयात सुरू असलेल्या दाव्यामध्ये जमिनीचा नकाशा आणि अहवाल सादर करण्यासाठी पंचवीस हजार रुपयांची लाच घेणाऱ्या राहाता भूमी अभिलेख कार्यालयातील अभिलेखपालास एसीबीच्या अधिकाऱ्यांनी रंगेहाथ पकडले.
विकास सूर्यभान दुशिंग (वय ५१ वर्ष, रा. शारदानगर, कोपरगाव) असे या लाचखोर अभिलेखपालाचे नाव आहे. एसीबीच्या अहमदनगर युनिटने सापळा अधिकारी पोलीस उपाधीक्षक प्रवीण लोखंडे यांच्या नेतृत्वाखाली ही यशस्वी कारवाई केली.
कोल्हार बुद्रुक, ता. राहाता, जि. अहमदनगर येथील तक्रारदाराने यासंदर्भात एसीबीकडे तक्रार केली होती. तक्रारदाराच्या तक्रारीची पडताळणी केल्यानंतर बुधवारी लाचखोर अधिकाऱ्यास पकडण्यासाठी सापळा लावण्यात आला होता. यात २५ हजार रुपयांची लाच घेताना भूमी अभिलेखचा वर्ग ३ चा अधिकारी विकास दुशिंग अलगत जाळ्यात अडकला.
तक्रारदाराने २०१७ मध्ये राहाता तालुक्यातील बाभळेश्वर बुद्रुक येथे गट क्रमांक व उपविभाग ६५ मध्ये १ हेक्टर ५२ आर शेती क्षेत्र विकत घेतले होते. सदर क्षेत्राची तक्रारदार यांनी खाजगी मोजणी केली असता ३२ आर क्षेत्र कमी भरले होते. त्यामुळे तक्रारदाराने सदर क्षेत्राची मोजणी होणेकरिता २०२२ मध्ये मा. दिवाणी न्यायालय, राहाता येथे अर्ज केला होता.
त्यानुसार मा. दिवाणी न्यायालयात दिवाणी दावा क्र. १५१/२०२२ चालू होता. सदर दाव्यामध्ये मा. न्यायालयाने दिनांक ०४/०२/२०२३ रोजीच्या आदेशात उप अधीक्षक, भूमी अभिलेख, राहाता यांना सदर जमिनीचा नकाशा व रिपोर्ट दि. १०/०३/२०२३ पावेतो सादर करण्यास आदेशीत केले होते. त्यानुसार तक्रारदाराने वेळोवेळी भूमिअभिलेख कार्यालयात जात दुशिंग यांना नकाशा व रिपोर्ट तयार करून मा. न्यायालायत लवकर सादर करा, या बाबत विनंती केली होती.
दि. २०/०६/२०२३ रोजी दुशिंग यांनी नकाशा व रिपोर्ट तयार केला होता. परंतु कोर्टात पाठविला नव्हता, म्हणून तक्रारदाराने दि. ०२/०७/२०२३ रोजी दुशिंग यांना भेटून नकाशा व रिपोर्ट न्यायालयात पाठविण्याची विनंती केली असता दुशिंग यांनी तक्रारदाराकडे त्यांच्या बाजूने नकाशा व रिपोर्ट न्यायालयात सादर करण्यासाठी २५ हजार रुपयांच्या लाचेची लाच मागणी केली होती.
त्यामुळे तक्रारदाराने यासंदर्भात अहमदनगरच्या लाच लुचपत विभागाशी संपर्क साधत बुधवारी तक्रार नोंदवली होती.
लाच लुचपत विभागाने तक्रारीची पडताळणी केली असता आरोपी लोकसेवक दुशिंग याने न्यायालयात रिपोर्ट सादर करण्यासाठी पंचासमक्ष लाच मागितल्याचे निष्पन्न झाले. सापळा अधिकारी पोलीस उपाधीक्षक प्रवीण लोखंडे यांच्या नेतृत्वाखाली पोलीस हेड कॉन्स्टेबल संतोष शिंदे, पोलिस अंमलदार रविंद्र निमसे, चालक पोलीस हेड कॉन्स्टेबल हरुन शेख यांच्या पथकाने विकास दुशिंग याला तक्रारदाराकडून पंचवीस हजार रुपयांची लाच घेताना रंगेहाथ पकडले. त्याच्या विरोधात राहाता पोलीस ठाण्यात गुन्हा नोंदविण्यात आला आहे.
