महाराष्ट्र संवाद न्यूज
नाशिक – लाखो विद्यार्थी घडविणाऱ्या गोखले एज्युकेशन सोसायटीचे सचिव तथा शिक्षण महर्षी म्हणून ओळखले जाणारे सर डॉ. मो. स. गोसावी यांचे रविवारी पहाटे पावणेदोन वाजेच्या दरम्यान वृद्धापकाळाने निधन झाले. मृत्यू समयी ते 88 वर्षांचे होते.
शिक्षण क्षेत्रात महत्त्वपूर्ण योगदान देणाऱ्या डॉ. मो. स. गोसावी यांनी वयाच्या 23 व्या वर्षी बी. वाय. के. कॉलेजचे प्राचार्य पद भूषविले. त्यानंतर पुढील 37 वर्ष त्यांनी या महाविद्यालयात शैक्षणिक योगदान दिले. अनेक विद्यार्थ्यांच्या आयुष्याला आकार देणाऱ्या गोखले एज्युकेशन सोसायटीच्या सचिव पदाची धुरा गेल्या साठ वर्षांपासून ते सांभाळत होते. डॉ. मो. स. गोसावी यांच्या योगदानातून लाखो विद्यार्थी आज मोठ्या पदांवर, उद्योजक, राजकारणी, वैद्यकीय व्यावसायिक, विधीज्ञासह अनेक क्षेत्रात कार्यरत आहेत.
डॉ. मो. स. गोसावी यांचे संस्थेच्या वाटचालीत महत्वपूर्ण योगदान राहिले आहे. त्यांच्या योगदानातून गोखले एज्युकेशन संस्था शैक्षणिक क्षेत्रातील प्रमुख संस्था म्हणून गणली जाते.
त्यांच्या पश्चात 2 मुले, मुलगी असा परिवार आहे. त्यांचे अंतिम दर्शन बी. वाय. के. कॉलेज येथे सकाळी 10 ते दुपारी 4 या दरम्यान घेता येणार आहे. त्यांची अंत्ययात्रा 5 वाजता काढण्यात येणार असून नाशिक अमरधाममध्ये त्यांच्यावर अंत्यसंस्कार करण्यात येणार असल्याचे म्हटले आहे.
