संपादकच अडकला एसीबीच्या जाळ्यात! धनादेश काढून देण्यासाठी वृद्ध शेतकऱ्याकडून दोन लाखाची लाच स्वीकारणाऱ्या दोघांना पकडले

महाराष्ट्र संवाद न्यूज 

उस्मानाबाद – पाझर तलाव आणि साठवण तलावाकरिता संपादित केलेल्या जमिनीच्या मोबदल्याचे 26,56,017/- व 4,31,798/- रुपयांचे दोन धनादेश उस्मानाबादच्या प्रांताधिकारी कार्यालयातून काढून देण्याच्या मोबदल्यात दोन लाख रुपयांची लाच स्वीकारणाऱ्या दोघा खाजगी उस्मानाबाद एसीबीने रंगेहात पकडले. पकडलेल्या लाचखोरात एका संपादकाचा समावेश आहे.

अनिरुद्ध अंबऋषी कावळे (वय 52 वर्ष, रा. केकस्थळवाडी, उस्मानाबाद) व बाबासाहेब हरिश्चंद्र अंधारे (वय 42 वर्ष, संपादक दैनिक मराठवाडा योद्धा, रा. गणपती मंदिर जवळ, आनंदनगर, उस्मानाबाद) अशी दोघा लाचखोरांची नावे आहेत.

यासंदर्भात अधिक माहिती अशी, तक्रारदादाच्या पत्नीच्या नावे असलेले शेत जमीन शासनाने पाझर तलाव आणि साठवण तलावासाठी संपादित केली आहे. संपादित केलेल्या जमिनीचा अधिकचा मोबदला न्यायालयाने दिलेल्या आदेशाप्रमाणे उस्मानाबादच्या प्रांताधिकारी कार्यालयातील अधिकारी व कर्मचाऱ्यांना सांगून धनादेश काढून देण्यासाठी तक्रारदार वृद्ध शेतकऱ्याकडे दोन लाख रुपयांची लाच दोघा खाजगी इसमांनी मागितली होती.

याची तक्रार संबंधित शेतकऱ्याने उस्मानाबादच्या अँटी करप्शन ब्युरोकडे केली होती. उस्मानाबाद ‘एसीबी’चे पोलीस निरीक्षक विकास राठोड यांनी लाचखोरांना पकडण्यासाठी शनिवारी सापळा लावला होता.

पंचासमक्ष लाच स्वीकारताना एसीबीने या दोघा खाजगी इसमांना ताब्यात घेतले असून त्यांच्या विरोधात आनंदनगर पोलीस ठाण्यात गुन्हा दाखल करण्यात आला.