महाराष्ट्र संवाद न्यूज
नेवासा (अहमदनगर) – नेवासा तालुक्यातील गेवराई येथे सोमवारी भर दुपारी दीड वाजण्याच्या सुमारास घरफोडी करण्यात आली. या घटनेत दागिने आणि रोकड रकमेसह नऊ लाख 60 हजार रुपयांचा मुद्देमाल चोरट्यांनी लंपास केला आहे.
गेवराई येथील सत्तरकर वस्तीवर घर पुढचा हा प्रकार घडला याप्रकरणी शिवाजी तुकाराम सत्तरकर यांनी नेवासे पोलीस ठाण्यात फिर्याद दिली आहे.
मिळालेल्या माहितीनुसार फिर्यादी सत्तरकर हे आपल्या कुटुंबीयांसह शेतात राहतात. सोमवारी सकाळी 11 वाजता घराची कडी लावून ते घराजवळ असलेल्या कांद्याच्या शेडमध्ये पत्नी आणि गावातील चार मजुरांसह कांदा भरण्यासाठी गेले होते. दुपारी दीड वाजण्याच्या सुमारास पिण्यासाठी पाणी आणण्याकरिता सत्तरकर यांच्या पत्नी घरी आले असता त्यांना एक जण घरातील कपाटे उचकट असल्याचे दिसून आले.
त्यामुळे सत्तरकर यांच्या पत्नीने आरडा ओरडा केला असता हा आरडाओरडा ऐकून सत्तरकर घराकडे आले असता त्याच वेळी त्यांना घरातून एक व्यक्ती पळून जात असल्याचे दिसून आले. सत्तरकर यांनी त्याला पकडण्याचा प्रयत्न केला असता दोघांमध्ये झालेल्या झटापटीत ती व्यक्ती सत्तरकर यांच्या तावडीतून निसटली.
पळून जाणारी व्यक्ती गेवराई-कुकाणे रस्त्यापर्यंत गेली असता तेथे आधीपासूनच दुचाकीवर थांबलेल्या आपल्या दोघा सहकाऱ्यांच्या दुचाकीवर बसून तिघेजण फरार झाले.
दरम्यान या घरफोडीच्या घटनेत सत्तरकर यांच्या घरातील बारा तोळ्याचे सोने आणि सहा लाख रुपयांचे रोकड असा 9 लाख 60 हजार रुपयांचा मुद्देमाल चोरट्यांनी चोरून नेला. घटनास्थळी श्वानपथक आणि ठसे तज्ञांना प्राचारण करण्यात आले. सत्तरकर यांच्याशी झालेल्या झटापटी दरम्यान आरोपी चोरट्याचा मोबाईल खाली पडला होता. त्याच्या आधारे पोलीस चोरट्यांचा शोध घेत आहे.
