महाराष्ट्र संवाद न्यूज
पुणे – मंगळवारी पहाटेच्या सुमारास कोथरूड पोलीस स्टेशन हद्दीत बेट मार्शल पेट्रोलिंग पथकातील दोघा कर्मचाऱ्यांनी तीन संशयित दुचाकी चोरांना पकडले. त्यांना घर झडतीसाठी नेले असता त्यांनी पळून जाण्याचा प्रयत्न केला. त्यातील दोघांना पकडण्यात पोलीस पथक यशस्वी झाले. तर एक जण पळून गेला.
आरोपींच्या घर झडतीमध्ये पोलिसांना एक जिवंत राऊंड चार मोबाईल आणि लॅपटॉप आढळून आला. पोलिसांना हे प्रकरण संशयास्पद वाटू लागल्याने त्यांनी याची माहिती दहशतवाद विरोधी पथकाला दिली आणि तपासा दरम्यान यातून मोठा उलगडा होऊ लागला. पोलीस अंमलदार प्रदीप चव्हाण आणि अमोल नजन या दोघांनी मोटर सायकल चोरीत पकडलेले संशयित चक्क मोस्ट वॉन्टेड आणि एनआयएच्या रडारवर असल्याचे समोर आले. यातून आणखी दोघा संशयतांची नावे समोर आले असून हे संशयित (NIA) राष्ट्रीय तपास यंत्रणेसाठी मोस्ट वॉन्टेड असून त्यांच्या अटकेवर पाच लाख रुपयांचे बक्षीस आहे.
पोलीस अंमलदार प्रदीप चव्हाण आणि अमोल नजन या दोघा पोलीस कर्मचाऱ्यांच्या कामगिरीमुळे दोन मोठे दहशतवादी पकडण्यात पोलीस यशस्वी झाले.
या दहशतवाद्यांचा पुण्यात घातपाताचा कट होता का अन्य काही या दृष्टीने तपास केला जात आहे. राष्ट्रीय तपास यंत्रणाच्या अधिकाऱ्यांचे अन्य पोलीस यंत्रणा तपासासाठी पुण्यात दाखल झाल्या आहेत. काही दिवसांपूर्वी राजस्थानच्या चित्तोडगड या ठिकाणी राष्ट्रीय तपास यंत्रणेने एक कारवाई केली होती. या कारवाई स्फोटक हाती लागले होते. या गुन्ह्यात हे आरोपी फरार असून त्यांच्यावर पाच लाख रुपयांचे बक्षीस ठेवण्यात आले आहे.
स्पर्धा परीक्षा पास न झाल्याने पोलीस दलातील शेवटच्या पायरीवर राहून गरीब घराण्यातील हे दोन्ही कर्मचारी आपले कर्तव्य बजावत आहे. त्यांच्यातील कामाची धडाडी, देशप्रेम आणि पोलीस दलाबद्दल असणारे आत्मीयता वाखाणण्याजोगी असून या कर्मचाऱ्यांनी दाखविलेल्या सतर्कतेमुळे दोन दहशतवादी हाती लागले असून या कर्मचाऱ्यांचे सर्वत्र कौतुक होत आहे.
