महाराष्ट्र संवाद न्यूज
संगमनेर – नशापाणी करण्यासाठी सार्वजनिक जागांचा वापर करणाऱ्या आणि सामाजिक स्वास्थ धोक्यात आणणाऱ्या नशेखोरांवर पोलीस प्रशासनाने कारवाईचे पाऊल टाकले आहे. पोलिसांनी वेगवेगळ्या ठिकाणी कारवाया करत नशेखोरांवर गुन्हे दाखल केले आहे. पोलिसांनी अनपेक्षित केलेल्या या कारवाईमुळे नशेखोरांमध्ये भीतीचे वातावरण निर्माण झाले आहे.
संगमनेर शहरातील मोकळ्या जागा, मैदाने, नगरपरिषदेने निर्माण केलेले विविध गार्डन, प्रवरा नदीपात्र, राज हॉटेल ते स्वामी समर्थ मंदिरा दरम्यानचा रस्ता आधी विविध ठिकाणचा वापर दारुडे, गर्दुल्ले, गांजाडी लोक सर्रासपणे करत असल्याने सामाजिक स्वास्थ्याला धोका निर्माण होण्याची चिन्हे होती. पोलिसांकडे या संदर्भात सातत्याने येत असलेल्या तक्रारीची गंभीर दाखल संगमनेरचे पोलीस उपाधीक्षक सोमनाथ वाघचौरे यांनी घेतली.
नशेखोरांमुळे परिसरातील नागरिक, महिला, मुली यांना होणारा त्रास लक्षात घेत वाकचौरे यांनी याला प्रतिबंध करण्यासाठी रविवारी नशेखोरांकडून वापर होत असलेल्या जागांची पोलिसांकडून सायंकाळी साडेसात ते साडेनऊच्या दरम्यान अचानक तपासणी केली असता पोलिसांना मोठ्या प्रमाणात नशेखोर आढळून आले. पोलिसांनी जाणता राजा मैदान, स्वदेश मैदान, गोल्डन सिटी, गंगामाई घाट आदीसह शहरातील सर्व मैदानाची तपासणी केली.
सदरची कारवाई संगमनेर पोलीस स्टेशनचे सहाय्यक पोलीस निरीक्षक राजेंद्र पवार, पोलीस उपनिरीक्षक निवांत जाधव, पोलीस उपनिरीक्षक जाणे यांच्यासह शहर पोलीस ठाण्यातील पोलीस कर्मचाऱ्यांनी केली आहे.
पोलिसांना या ठिकाणी जे-जे लोक नशा करताना, दारू पिताना मिळून आले, त्या सर्वांवर महाराष्ट्र दारूबंदी कायदा कलम 185, कलम 84, कलम 85 तसेच महाराष्ट्र पोलीस कायद्याच्या विविध कलमाखाली कारवाई करण्यात आली असल्याची माहिती पोलीस उपाधीक्षक सोमनाथ वाघचौरे यांनी दिली आहे.
