महाराष्ट्र संवाद न्यूज
मुंबई – कोविड घोटाळा प्रकरणी कोणाला सोडणार नसल्याचा इशारा मुख्यमंत्र्यांनी कालच विधानसभेत दिल्यानंतर आज शनिवारी मुंबईच्या माजी महापौर आणि ठाकरे गटाच्या प्रवक्त्या किशोरी पेडणेकर यांच्या विरोधात गुन्हा दाखल करण्यात आला आहे. शिवसेना (ठाकरे) गटासाठी हा मोठा धक्का असून पेडणेकर यांच्या अडचणीत वाढ झाली आहे.
काय आहे आरोप : कोविड सेंटर कथीत घोटाळ्याप्रकरणी आर्थिक गुन्हे शाखेने आग्रापाडा पोलीस ठाण्यात पेडणेकर यांच्यासह महापालिकेच्या दोन वरिष्ठ अधिकाऱ्यांविरोधात हा गुन्हा दाखल केला असून पेडणेकर महापौर असताना हा घोटाळा झाला होता. कोविड उपचाराच्या औषधांची खरेदी वाढीव दराने करण्यात आली होती. तसेच बॉडीबॅग खरेदीचाही घोटाळा झाला होता. दोन हजार रुपये किमतीची बॉडीबॅग सहा हजार आठशे रुपयांना विकत घेण्यात आली होती. महापौर किशोरी पेडणेकर यांच्या सांगण्यावरून हे कॉन्ट्रॅक्ट दिलं गेल्याचं सांगितलं जातं. त्यामुळेच त्यांच्यावर गुन्हा दाखल करण्यात आला आहे.
सभागृहात मुख्यमंत्री शिंदे काय म्हणाले होते : सभागृहात कोविड घोटाळ्याचा मुद्दा गाजल्यानंतर खुद्द मुख्यमंत्री एकनाथ शिंदे यांनी चार पाचशे रुपयांची बॉडी बॅग सहा हजार रुपयांना विकत घेतल्याचे सांगितले होते. कोविडमध्ये आपण काम करत होतो, लोक मदत करत होते, ज्यावेळी लोक मरत होते त्यावेळी काही लोक पैसे कमवत होते हे दुर्दैव आहे. यामध्ये जो घोटाळा केला आहे त्यांना बिलकुल सोडणार नाही, असा इशारा त्यांनी दिला होता.
लाईफ लाईन की डेडलाईन हॉस्पिटल : माणसांना मारणार हॉस्पिटल होतं ते. आपल्याच लोकांना कन्ट्रॅक्ट दिलं. ज्यांना अनुभव नाही त्यांना काम दिलं. त्या हॉस्पिटलमध्ये डॉक्टर नव्हते पण डॉक्टर असल्याचे दाखवून पैसे कमावले, असा गंभीर आरोप देखील शिंदे यांनी केला होता.
