महाराष्ट्र संवाद न्यूज
नाशिक – राज्यात एकीकडे महसूलमंत्र्यांच्या संकल्पनेतून प्रथमच महसूल सप्ताह पाळला जात असताना या सप्ताह काळातच नाशिकच्या तहसीलदारांची लाचखोरी समोर आली आहे. तब्बल 15 लाख रुपयांची लाच घेताना नाशिकच्या तहसीलदारास एसीबीने रंगेहात पकडले. नरेशकुमार तुकाराम बहिरम (वय 44 वर्ष, रा. फ्लॅट नंबर 604, बी विंग, मेरिडियन गोल्ड, कर्मयोगी नगर, नाशिक) असे एसीबीने पकडलेल्या लाचखोर तहसीलदाराचे नाव आहे.
महसूल सप्ताहातच मोठा मासा एसीबीच्या गळाला लागला : महसूल मंत्री राधाकृष्ण विखे पाटील यांनी राज्यात महसूल विभाग लोकाभिमुख आणि गतिमान करण्यासाठी प्रथमच महसूल सप्ताह राबविण्यास सुरुवात केली आहे. या सप्ताहामध्ये महसूलच्या नायब तहसीलदारापाठोपाठ आता तहसीलदार एसीबीच्या जाळ्यात अडकला आहे. दोन दिवसांपूर्वीच वर्धा जिल्ह्यातील देवळी येथील नायब तहसीलदार किशोर शेंडे शेतकऱ्याकडून तीन हजार रुपयांची लाज घेताना एसीबीच्या जाळ्यात अडकला होता त्या पाठोपाठ शनिवारी नाशिकमध्येच लाचखोरी करणारा तहसीलदार एसीबीच्या गळाला लागला आहे.
काय आहे प्रकरण : राजुर बहुला येथील मुरूम उत्खननाबाबत मूल्य नियमानुसार पाचपट दंड स्वामीत्वदन जागा भाडे मिळून 1 कोटी 25 लाख 06 हजार 220 रुपये दंड आकारणी करण्याबाबत तहसीलदार बहिरम यांच्या कार्यालयाकडून आदेश आले होते. या आदेशा विरोधात जमीन मालकाने नाशिकच्या प्रांताधिकार्‍यांकडे अपील दाखल केले होते. याबाबत आदेश होऊन सदरचे प्रकरण फेर चौकशीसाठी पुन्हा तहसीलदार नरेशकुमार बहिरम यांच्याकडे पाठविण्यात आले होते.
नेमक काय घडलं : मिळकती मधील केलेल्या मुरूम उत्खननाचा त्याच जागेत वापर केल्याचे जमिनीच्या मालकांचे म्हणणे होते. त्यामुळे याबाबत पडताळणी करण्यासाठी तहसीलदार बहिरम यांनी जमिनीच्या मालकांना त्यांच्या मालकीच्या राजुर बहुला येथे स्थळ निरीक्षणावेळी बोलावले होते. भिंतीवर मात्र जमीन मालक वयोवृद्ध व आजारी असल्याने त्यांनी त्यांच्या वतीने तक्रारदारास कायदेशीर कारवाई कामे अधिकार पत्र दिले होते.
तहसीलदारांनी केली लाचेची मागणी : तक्रारदार स्थळनिरीक्षणावेळी तहसीलदारांना भेटले असता तहसीलदार बहिरम यांनी तक्रारदाराकडे लाचेची मागणी केली. तडजोडीअंती पंधरा लाख रुपयांवर लाचेचा व्यवहार निश्चित झाला. शनिवारी (ता. 5 ऑगस्ट) तक्रारदाराकडून पंधरा लाख रुपये स्वीकारताना एसीबीने तहसीलदारास पकडले असून याप्रकरणी गुन्हा दाखल करण्याचे काम सुरू होते.
