दरोडा, जबरी चोरीसह विविध गुन्ह्यातील ‘हा’ आरोपी नगर, नाशिक जिल्ह्यातून हद्दपार; पोलीस उपाधीक्षकांची माहिती

संगमनेर – दरोड्यासह विविध प्रकारच्या चोरीचे गंभीर गुन्हे दाखल असलेल्या संगमनेरमधील विक्रम उर्फ पिल्या रामनाथ घोडेकर याला संगमनेरच्या प्रांताधिकार्‍यांनी सहा महिन्यांसाठी नगर आणि नाशिक जिल्ह्यातून हद्दपार केले. पोलीस उपाधीक्षक सोमनाथ वाघचौरे यांनी यासंदर्भात माहिती दिली.

विक्रम उर्फ पिल्या रामनाथ घोडेकर (रा. पंपिंग स्टेशन संगमनेर) याच्या विरोधात संगमनेर शहर पोलीस स्टेशन, संगमनेर तालुका पोलीस स्टेशन आणि घारगाव पोलीस स्टेशनमध्ये विविध स्वरूपाचे तब्बल नऊ गुन्हे दाखल असून यामध्ये दरोडा टाकणे, जबरी चोरी करणे, मोटार सायकल चोरी करणे, शिवीगाळ, दमदाटी, जखमी करणे आदी स्वरूपाच्या गुन्ह्यांचा समावेश आहे.

कायदा आणि सुव्यवस्थेच्या दृष्टिकोनातून गुन्हेगारी पार्श्वभूमी असलेल्या विक्रम उर्फ पिल्या रामनाथ घोडेकर यांच्या हद्दपारीचा प्रस्ताव संगमनेर शहर पोलीस निरीक्षक भगवान मथुरे यांनी संगमनेरचे पोलीस उपाधीक्षक सोमनाथ वाघचौरे यांच्याकडे कारवाईसाठी पाठविला होता.

उपाधीक्षक वाघचौरे यांनी हा प्रस्ताव पुढील कार्यवाहीसाठी संगमनेरचे प्रांताधिकारी शैलेंद्र हिंगे यांच्याकडे पाठविला. प्रांताधिकारी हिंगे यांनी यासंदर्भात खातरजमा झाल्यानंतर विक्रम घोडेकर याला सहा महिन्यांसाठी अहमदनगर आणि नाशिक जिल्ह्यातून हद्दपार करण्याचे आदेश पारित केले आहेत.