महाराष्ट्र संवाद न्यूज ऑनलाईन- राहूरी तालुक्यात अवैध गौण खनिज उत्खनन आणि विनापरवाना वाहतूक रोखण्यासाठी गेलेल्या महसूल प्रशासनावर गौण खनिज माफियांची अरेरावी समोर आली आहे.कारवाई करण्यासाठी गेलेले परिवीक्षाधीन प्रांताधिकारी विनीत विक्रांत शिर्के यांच्यावर पिंपळगाव फुणगी परिसरात प्राणघातक हल्ला करण्यात आला.
अवैध मुरूम व वाळू वाहतूक करणारा डंपर अडवला असता, आरोपींनी धक्काबुक्की करत प्रांताधिकाऱ्यांना डंपरमधून खाली ढकलून दिले तसेच त्यांच्या अंगावर वाहन घालून जीवे मारण्याचा प्रयत्न केला. प्रसंगावधान राखत प्रांताधिकाऱ्यांनी बाजूला उडी मारल्याने सुदैवाने मोठा अनर्थ टळला.
या गंभीर प्रकरणी राहूरी पोलीस ठाण्यात डंपर चालक धनराज चौधरी, मालक दीपक उर्फ प्रवीण बबन लाटे (रा. चिंचोली, ता. राहूरी) यांच्यासह सहा अन्य अनोळखी व्यक्ती, अशा एकूण आठ जणांविरुद्ध भारतीय न्याय संहितेच्या विविध गंभीर कलमांनुसार गुन्हा दाखल करण्यात आला आहे. या घटनेमुळे महसूल अधिकाऱ्यांच्या सुरक्षेचा प्रश्न ऐरणीवर आला असून, पोलीस निरीक्षक रवींद्र देशमुख या प्रकरणाचा पुढील तपास करत आहेत.
